sahra-e-zindagi ke liye nur-e-dida hun

sahrā-e-zindagī ke liye nūr-e-dīda huuñ

kāñTā sahī magar maiñ gul-e-nau-damīda huuñ

mujh par khulā hai ahd-e-bahār-o-ḳhizāñ kā raaz

maiñ ik hasīn phuul kā rang-e-parīda huuñ

tujh ko bhī zindagī ne diyā dard-e-be-karāñ

maiñ bhī ġham-e-hayāt kā lazzat-chashīda huuñ

tujh se mirā ta.alluq-e-ḳhātir hai dā.imī

tū hai agar ġhazal to maiñ terā qasīda huuñ

duniyā miTī huī hai mire iḳhtisār par

doshīza-e-hayāt kī zulf-e-burīda huuñ

tum ko mire taġhāful-e-be-jā kā hai gila

maiñ kuchh dinoñ se ḳhud se bhī dāman-kashīda huuñ

maiñ sochtā huuñ mujh pe ye tohmat hai kis liye

ab vo bhī kah rahe haiñ ki maiñ barguzīda huuñ

kāñToñ se kheltā huuñ gulistān-e-ishq meñ

'parvez' fart-e-shauq meñ dāman-darīda huuñ

sahra-e-zindagi ke liye nur-e-dida hun

kanTa sahi magar main gul-e-nau-damida hun

mujh par khula hai ahd-e-bahaar-o-KHizan ka raaz

main ek hasin phul ka rang-e-parida hun

tujh ko bhi zindagi ne diya dard-e-be-karan

main bhi gham-e-hayat ka lazzat-chashida hun

tujh se mera talluq-e-KHatir hai daimi

tu hai agar ghazal to main tera qasida hun

duniya miTi hui hai mere iKHtisar par

doshiza-e-hayat ki zulf-e-burida hun

tum ko mere taghaful-e-be-ja ka hai gila

main kuchh dinon se KHud se bhi daman-kashida hun

main sochta hun mujh pe ye tohmat hai kis liye

ab wo bhi kah rahe hain ki main barguzida hun

kanTon se khelta hun gulistan-e-ishq mein

'parwez' fart-e-shauq mein daman-darida hun