sahra ke sangin safar mein aab-rasani kam na paDe

sahrā ke sañgīn safar meñ āb-rasānī kam na paḌe

saarī āñkheñ bhar kar rakhnā dekho paanī kam na paḌe

zehn musalsal qisse socheñ hoñTh musalsal zikr kareñ

sub.h talak zinda rahnā hai kahīñ kahānī kam na paḌe

ishq ne sauñpā hai mujh ko ik sahrā kī ta.amīr kā kaam

aur hidāyat kī hai zarra bhar vīrānī kam na paḌe

merī shah-rag kaaTī us ne aur kahā shoḳhī ke saath

tū sachchā āshiq hai to phir dekh ravānī kam na paḌe

thoḌā thoḌā martā bhī rahtā huuñ maiñ jiine ke saath

taaki vaqt-e-zarūrat marne kī āsānī kam na paḌe

sajda karne ko hotā huuñ ek bahut hī baḌe but kā

aur phir sochtā huuñ ye chhoTī sī peshānī kam na paḌe

hameñ chhupāne ko duniyā ne khol diye kapḌoñ ke thaan

chāk-garebānī ye tirā zor-e-uryānī kam na paḌe

tum 'farhat-ehsās' bas apne aap ko marne mat denā

taaki daftar-e-duniyā meñ daḳhl-e-insānī kam na paḌe

sahra ke sangin safar mein aab-rasani kam na paDe

sari aankhen bhar kar rakhna dekho pani kam na paDe

zehn musalsal qisse sochen honTh musalsal zikr karen

subh talak zinda rahna hai kahin kahani kam na paDe

ishq ne saunpa hai mujh ko ek sahra ki tamir ka kaam

aur hidayat ki hai zarra bhar virani kam na paDe

meri shah-rag kaTi us ne aur kaha shoKHi ke sath

tu sachcha aashiq hai to phir dekh rawani kam na paDe

thoDa thoDa marta bhi rahta hun main jine ke sath

taki waqt-e-zarurat marne ki aasani kam na paDe

sajda karne ko hota hun ek bahut hi baDe but ka

aur phir sochta hun ye chhoTi si peshani kam na paDe

hamein chhupane ko duniya ne khol diye kapDon ke than

chaak-garebani ye tera zor-e-uryani kam na paDe

tum 'farhat-ehsas' bas apne aap ko marne mat dena

taki daftar-e-duniya mein daKHl-e-insani kam na paDe