sail-e-bala-e-gham na puchh kitne gharaunde Dah gae

sail-e-balā-e-ġham na pūchh kitne gharauñde Dah ga.e

naav to ḳhair naav thī saath kināre bah ga.e

dil meñ hujūm-e-shauq thā lab pe na baat aa sakī

abr falak pe khul ga.e biij zamīñ pe rah ga.e

kis meñ thī tāb-e-zaḳhm-e-shauq kis meñ thā ġham kā hausla

ham hī ye dukh uThā ga.e ham hī ye dard sah ga.e

ham-safarān-e-shauq ne raah meñ haar maan lī

dasht-e-shab-e-firāq meñ ham hī akele rah ga.e

'mohsin'-e-be-navā ko bhī dād-e-kamāl dījiye

vo bhī hadīs-e-dard-e-jāñ apnī ġhazal meñ kah ga.e

sail-e-bala-e-gham na puchh kitne gharaunde Dah gae

naw to KHair naw thi sath kinare bah gae

dil mein hujum-e-shauq tha lab pe na baat aa saki

abr falak pe khul gae bij zamin pe rah gae

kis mein thi tab-e-zaKHm-e-shauq kis mein tha gham ka hausla

hum hi ye dukh uTha gae hum hi ye dard sah gae

ham-safaran-e-shauq ne rah mein haar man li

dasht-e-shab-e-firaq mein hum hi akele rah gae

'mohsin'-e-be-nawa ko bhi dad-e-kamal dijiye

wo bhi hadis-e-dard-e-jaan apni ghazal mein kah gae