sair-e-chaman hai aur wo gul-ru kanar mein

sair-e-chaman hai aur vo gul-rū kanār meñ

maiñ be-piye bhī mast huuñ ab kī bahār meñ

kab se huuñ kyā batā.ūñ talāsh-e-bahār meñ

ik phuul bhī na thā chaman-e-rozgār meñ

chāleñ na.ī na.ī sī haiñ raftār-e-yār meñ

paḌ jā.egā ḳhalal ravish-e-rozgār meñ

dil aur jaan donoñ bhī haiñ kis shumār meñ

aap iḳhtiyār meñ haiñ to sab iḳhtiyār meñ

kyuuñ nā-umīd aap kā ummīd-vār ho

sab kuchh hai kyā nahīñ nigah-e-sharmsār meñ

mujh ko jab apnī baat kā rahtā nahīñ ḳhayāl

kyuuñ bad-zanī na aa.e dil-e-rāzdār meñ

is se ziyāda lutf kā tālib nahīñ huuñ maiñ

ummīd ban ke rah dil-e-ummīd-vār meñ

yā maut aa.egī mujhe yā niiñd aa.egī

aur ek shab guzār to duuñ intizār meñ

ai dard-e-ishq baat to jab hai ki mere dost

marne ke ba.ad chain na pā.ūñ mazār meñ

naala ḳhilāf-e-va.ada kiyā haa.e kyā kiyā

sun le jo vo to farq paḌā e'tibār meñ

vo kyuuñ bulā.eñ bazm meñ mujh bad-nasīb ko

ghul-mil ke baiThnā nahīñ aatā hai chaar meñ

maiñ ne bhī tauba toḌ dī apnī to kyā huā

duniyā ke log kyā nahīñ karte bahār meñ

merā vaqār aap kā ārām bhī gayā

āḳhir ye kyā balā hai dil-e-be-qarār meñ

ik taaza vārdāt hai har ek dam ke saath

mere irāde aa nahīñ sakte shumār meñ

sau mehrbāniyoñ ke evaz muskurā diyā

sarkār ne kamāl kiyā iḳhtisār meñ

hogā jab un kā qahr qayāmat hī aa.egī

zinde raheñge ghar meñ na murde mazār meñ

kahte haiñ log maut se bad-tar hai intizār

merī tamām-umr kaTī intizār meñ

niklegā ab ke jo bhī tirā ai muġhāñ-navāz

phūloñ meñ rakh ke deñge tujhe ham bahār meñ

nāseh bhī chāragar bhī ye do do azaab kyuuñ

munkir-nakīr aate haiñ vo bhī mazār meñ

khaa.ī huī qasam to ḳhudā ke liye na khā

apnī taraf se farq na Daal e'tibār meñ

zāhid kī tarah aur haiñ masjid meñ saikḌoñ

ye kis shumār meñ hai vahāñ kis qatār meñ

ishq aur aap vaah safī' vāh-vāh-vā

ġham aur haa.e zindagī-e-musta.ār meñ

sair-e-chaman hai aur wo gul-ru kanar mein

main be-piye bhi mast hun ab ki bahaar mein

kab se hun kya bataun talash-e-bahaar mein

ek phul bhi na tha chaman-e-rozgar mein

chaalen nai nai si hain raftar-e-yar mein

paD jaega KHalal rawish-e-rozgar mein

dil aur jaan donon bhi hain kis shumar mein

aap iKHtiyar mein hain to sab iKHtiyar mein

kyun na-umid aap ka ummid-war ho

sab kuchh hai kya nahin nigah-e-sharmsar mein

mujh ko jab apni baat ka rahta nahin KHayal

kyun bad-zani na aae dil-e-raazdar mein

is se ziyaada lutf ka talib nahin hun main

ummid ban ke rah dil-e-ummid-war mein

ya maut aaegi mujhe ya nind aaegi

aur ek shab guzar to dun intizar mein

ai dard-e-ishq baat to jab hai ki mere dost

marne ke baad chain na paun mazar mein

nala KHilaf-e-wada kiya hae kya kiya

sun le jo wo to farq paDa e'tibar mein

wo kyun bulaen bazm mein mujh bad-nasib ko

ghul-mil ke baiThna nahin aata hai chaar mein

main ne bhi tauba toD di apni to kya hua

duniya ke log kya nahin karte bahaar mein

mera waqar aap ka aaram bhi gaya

aaKHir ye kya bala hai dil-e-be-qarar mein

ek taza wardat hai har ek dam ke sath

mere irade aa nahin sakte shumar mein

sau mehrbaniyon ke ewaz muskura diya

sarkar ne kamal kiya iKHtisar mein

hoga jab un ka qahr qayamat hi aaegi

zinde rahenge ghar mein na murde mazar mein

kahte hain log maut se bad-tar hai intizar

meri tamam-umr kaTi intizar mein

niklega ab ke jo bhi tera ai mughan-nawaz

phulon mein rakh ke denge tujhe hum bahaar mein

naseh bhi chaaragar bhi ye do do azab kyun

munkir-nakir aate hain wo bhi mazar mein

khai hui qasam to KHuda ke liye na kha

apni taraf se farq na Dal e'tibar mein

zahid ki tarah aur hain masjid mein saikDon

ye kis shumar mein hai wahan kis qatar mein

ishq aur aap wah safi' wah-wah-wa

gham aur hae zindagi-e-mustaar mein