salam aaya na kuchh paigham aaya

salām aayā na kuchh paiġhām aayā

taġhāful un kā mere kaam aayā

vo haiñ apne na hone se numāyāñ

nigāhoñ par nayā ilzām aayā

masal mash.hūr hai ye mai-kade meñ

huā puḳhta yahāñ jo ḳhaam aayā

hakīm-e-‘asr ko mastī meñ aakar

'ilāj-e-gardish-e-ayyām aayā

shab-e-ġham dil ko taḌpāne hī aa.e

tum aa.e yā tumhārā naam aayā

mohabbat vaqt par hākim hai phir bhī

tasavvur un kā sub.h-o-shām aayā

dar-e-pīr-e-muġhāñ par hai ye katba

gayā ḳhush-kām jo nākām aayā

jo dekhā mahd se lekar lahad tak

ga.iiñ bechainiyāñ ārām aayā

'zahīñ' pairāhan-e-yūsuf samajh kar

ġhilāf-e-kā’ba ko maiñ thaam aayā

salam aaya na kuchh paigham aaya

taghaful un ka mere kaam aaya

wo hain apne na hone se numayan

nigahon par naya ilzam aaya

masal mashhur hai ye mai-kade mein

hua puKHta yahan jo KHam aaya

hakim-e-‘asr ko masti mein aakar

'ilaj-e-gardish-e-ayyam aaya

shab-e-gham dil ko taDpane hi aae

tum aae ya tumhaara nam aaya

mohabbat waqt par hakim hai phir bhi

tasawwur un ka subh-o-sham aaya

dar-e-pir-e-mughan par hai ye katba

gaya KHush-kaam jo nakaam aaya

jo dekha mahd se lekar lahad tak

gain bechainiyan aaram aaya

'zahin' pairahan-e-yusuf samajh kar

ghilaf-e-ka’ba ko main tham aaya