saman ghurub ka dil mein raha ubharte hue

samāñ ġhurūb kā dil meñ rahā ubharte hue

ḳhayāl ḳhaak meñ milne kā thā sañvarte hue

zamīñ udaas hai aur āsmāñ pe ḳhanda-kunāñ

guzar rahe haiñ sitāre udaas karte hue

bikhar gayā to mujhe koī ġham nahīñ is kā

ki raaz mujh pe ka.ī vā hue bikharte hue

fasurda itnī hai is baar rahguzār-e-ḳhayāl

ḳhirām-e-yār jhijaktā hai gul katarte hue

mujhe bhī apnā dil-e-rafta yaad aatā hai

kabhī kabhī kisī bāzār se guzarte hue

zamāna lab pe ye añgusht rakh ke kahtā hai

ki dard-e-dil na kaho aur kaho to Darte hue

laboñ se niim tabassum bhī uTh gayā 'ḳhurshīd'

udāsiyoñ kā mudāvā talāsh karte hue

saman ghurub ka dil mein raha ubharte hue

KHayal KHak mein milne ka tha sanwarte hue

zamin udas hai aur aasman pe KHanda-kunan

guzar rahe hain sitare udas karte hue

bikhar gaya to mujhe koi gham nahin is ka

ki raaz mujh pe kai wa hue bikharte hue

fasurda itni hai is bar rahguzar-e-KHayal

KHiram-e-yar jhijakta hai gul katarte hue

mujhe bhi apna dil-e-rafta yaad aata hai

kabhi kabhi kisi bazar se guzarte hue

zamana lab pe ye angusht rakh ke kahta hai

ki dard-e-dil na kaho aur kaho to Darte hue

labon se nim tabassum bhi uTh gaya 'KHurshid'

udasiyon ka mudawa talash karte hue