samajh ke hur baDe naz se lagai choT

samajh ke huur baḌe naaz se lagā.ī choT

jo us ne aa.ina dekhā to ḳhud hī khaa.ī choT

nazar laḌī jo nazar se to dil par aa.ī choT

gire kalīm sar-e-tūr aisī khaa.ī choT

laboñ pe ban ga.ī missī jo dil par aa.ī choT

jagah badal ke lagī karne ḳhud-numā.ī choT

baḌe dimāġh se maarā nazar se jab maarā

baḌe ġhurūr se aa.ī jo dil par aa.ī choT

kisī kā tuur pe niklā hai haath parde se

baḌā mazā ho kare gar tirī kalā.ī choT

ye dauḌ-dhūp laḌakpan kī yak qayāmat hai

ki Thokaroñ se qayāmat ne ḳhuub khaa.ī choT

abhī uThī na thī nīchī nigāh zālim kī

taḌap ke dil ne kahā vo jigar pe aa.ī choT

jo aa.e hashr meñ vo sab ko mārte aa.e

jidhar nigāh phirī choT par lagā.ī choT

jo dil kā aa.ina mal mal ke ham ne saaf kiyā

phisal phisal ke tumhārī nazar ne khaa.ī choT

cluff nahīñ hai nishāñ hai ye chāñd-mārī kā

hamāre chāñd ne lo chāñd par lagā.ī choT

ġhash aa rahā hai mujhe zikr-e-lan-tarānī se

lagī hai dil pe mire lo sunī-sunā.ī choT

rukeñge kyā kaf-e-gustāḳh dast-e-rañgīñ se

kahīñ na khaa.e tirā panja-e-hinā.ī choT

dil-o-jigar ko batā kar vo loTnā merā

vo pūchhnā tirā kis kis jagah par aa.ī choT

marīz-e-hijr ye samjhā jo chamkī charḳh pe barq

ye aag señkne laa.ī shab-e-judā.ī choT

uThe taḌap ke uThe to gire gire to mare

phaḌak ke rah ga.e vo choT par lagā.ī choT

paḌegī aah jo merī khuleñge band-e-qabā

shab-e-visāl karegī girah-kushā.ī choT

girā huuñ ḳhuld se lanka meñ pahle tuur pe ba.ad

jahāñ jahāñ maiñ gayā saath saath aa.ī choT

vo jhāñk jhāñk ke laḌte haiñ mujh se ye kah kar

jo ham ne vaar kiyā tum ne kyuuñ bachā.ī choT

jo dard dil meñ uThā un kī yaad khich aa.ī

dikhātī hai asar-e-jazb-e-kahrubā.ī choT

uThā uThā ke dil-e-muztarib ne de Tapkā

girā girā ke mujhe choT par lagā.ī choT

nigāh-e-shoḳh se jis dam nigāh-e-shauq laḌī

baḌā hī lutf rahā ye ga.ī vo aa.ī choT

lagā.ī us ne jo Thokar to jī uThā 'mā.il'

nikal ke jaan phir aa.ī kuchh aisī khaa.ī choT

samajh ke hur baDe naz se lagai choT

jo us ne aaina dekha to KHud hi khai choT

nazar laDi jo nazar se to dil par aai choT

gire kalim sar-e-tur aisi khai choT

labon pe ban gai missi jo dil par aai choT

jagah badal ke lagi karne KHud-numai choT

baDe dimagh se mara nazar se jab mara

baDe ghurur se aai jo dil par aai choT

kisi ka tur pe nikla hai hath parde se

baDa maza ho kare gar teri kalai choT

ye dauD-dhup laDakpan ki yak qayamat hai

ki Thokaron se qayamat ne KHub khai choT

abhi uThi na thi nichi nigah zalim ki

taDap ke dil ne kaha wo jigar pe aai choT

jo aae hashr mein wo sab ko marte aae

jidhar nigah phiri choT par lagai choT

jo dil ka aaina mal mal ke hum ne saf kiya

phisal phisal ke tumhaari nazar ne khai choT

cluff nahin hai nishan hai ye chand-mari ka

hamare chand ne lo chand par lagai choT

ghash aa raha hai mujhe zikr-e-lan-tarani se

lagi hai dil pe mere lo suni-sunai choT

rukenge kya kaf-e-gustaKH dast-e-rangin se

kahin na khae tera panja-e-hinai choT

dil-o-jigar ko bata kar wo loTna mera

wo puchhna tera kis kis jagah par aai choT

mariz-e-hijr ye samjha jo chamki charKH pe barq

ye aag senkne lai shab-e-judai choT

uThe taDap ke uThe to gire gire to mare

phaDak ke rah gae wo choT par lagai choT

paDegi aah jo meri khulenge band-e-qaba

shab-e-visal karegi girah-kushai choT

gira hun KHuld se lanka mein pahle tur pe baad

jahan jahan main gaya sath sath aai choT

wo jhank jhank ke laDte hain mujh se ye kah kar

jo hum ne war kiya tum ne kyun bachai choT

jo dard dil mein uTha un ki yaad khich aai

dikhati hai asar-e-jazb-e-kahrubai choT

uTha uTha ke dil-e-muztarib ne de Tapka

gira gira ke mujhe choT par lagai choT

nigah-e-shoKH se jis dam nigah-e-shauq laDi

baDa hi lutf raha ye gai wo aai choT

lagai us ne jo Thokar to ji uTha 'mail'

nikal ke jaan phir aai kuchh aisi khai choT