samar se puchh lo zauq-e-tarash kaisa hai

samar se pūchh lo zauq-e-tarāsh kaisā hai

vo dil jo tum ne kiyā qaash qaash kaisā hai

koī to saql girā hogā bahr-e-sākit meñ

vagarna phir ye dilī irti.āsh kaisā hai

na ta.aziyat kī zarūrat na fikr-e-ġhamzadagāñ

hanūt jis ne bhī kī apnī laash kaisā hai

nuqūsh-e-maslak-o-minhāj hī batā.eñge

vo ḳhush-mizāj hai yā bad-qimāsh kaisā hai

havās-bhāḳhta jis se haiñ āsmān-o-zamīñ

batā vo sāneha-e-dil-ḳharāsh kaisā hai

vo jī rahā thā duāoñ ke saḳht narġhe meñ

hisār-e-zāt huā paash paash kaisā hai

vajūd us kā thā ā.īna-e-tilismātī

vo aks jis ne kiyā raaz faash kaisā hai

qimār-ḳhāna-e-dil meñ ḳhayāl-e-rañgīñ se

jo shaḳhs kheltā rahtā thā taash kaisā hai

kahīñ to vo bhī tumhārī tarah na ho 'rāhī'

batāo jis kī hai tum ko talāsh kaisā hai

samar se puchh lo zauq-e-tarash kaisa hai

wo dil jo tum ne kiya qash qash kaisa hai

koi to saql gira hoga bahr-e-sakit mein

wagarna phir ye dili irtiash kaisa hai

na taziyat ki zarurat na fikr-e-ghamzadagan

hanut jis ne bhi ki apni lash kaisa hai

nuqush-e-maslak-o-minhaj hi bataenge

wo KHush-mizaj hai ya bad-qimash kaisa hai

hawas-bhaKHta jis se hain aasman-o-zamin

bata wo saneha-e-dil-KHarash kaisa hai

wo ji raha tha duaon ke saKHt narghe mein

hisar-e-zat hua pash pash kaisa hai

wajud us ka tha aaina-e-tilismati

wo aks jis ne kiya raaz fash kaisa hai

qimar-KHana-e-dil mein KHayal-e-rangin se

jo shaKHs khelta rahta tha tash kaisa hai

kahin to wo bhi tumhaari tarah na ho 'rahi'

batao jis ki hai tum ko talash kaisa hai