samjho ki har bala se hifazat mein kaT gai

samjho ki har balā se hifāzat meñ kaT ga.ī

insān kī jo raat ibādat meñ kaT ga.ī

us ko sukūn mil nahīñ saktā faqīrī meñ

umr-e-darāz jis kī siyāsat meñ kaT ga.ī

apnoñ ke vāste maiñ ne sab kuchh luTā diyā

shah-rag bachī thī vo bhī mohabbat meñ kaT ga.ī

qurbānī dī hamesha maiñ ne mulk ke liye

gardan bhī merī us kī hifāzat meñ kaT ga.ī

khoī haiñ kitnī sunnateñ ham ne huzūr kī

dāḌhī bhī is zamāne kī sohbat meñ kaT ga.ī

ham ko to chāhiye thā mohabbat hī bāñTte

afsos hai ki umr ye nafrat meñ kaT ga.ī

rab ke huzūr hāzirī kā jab yaqīn thā

to kyoñ ye zindagī tirī ġhaflat meñ kaT ga.ī

dushvār thā safar yuuñ to 'hādī' ke vāste

lekin ye raah terī rifāqat meñ kaT ga.ī

samjho ki har bala se hifazat mein kaT gai

insan ki jo raat ibaadat mein kaT gai

us ko sukun mil nahin sakta faqiri mein

umr-e-daraaz jis ki siyasat mein kaT gai

apnon ke waste main ne sab kuchh luTa diya

shah-rag bachi thi wo bhi mohabbat mein kaT gai

qurbani di hamesha main ne mulk ke liye

gardan bhi meri us ki hifazat mein kaT gai

khoi hain kitni sunnaten hum ne huzur ki

daDhi bhi is zamane ki sohbat mein kaT gai

hum ko to chahiye tha mohabbat hi banTte

afsos hai ki umr ye nafrat mein kaT gai

rab ke huzur haziri ka jab yaqin tha

to kyon ye zindagi teri ghaflat mein kaT gai

dushwar tha safar yun to 'hadi' ke waste

lekin ye rah teri rifaqat mein kaT gai