samundaron ke safar par hain rahnuma bhi nahin

samundaroñ ke safar par haiñ rahnumā bhī nahīñ

ham aise logoñ kī kashtī kā nāḳhudā bhī nahīñ

yaqīn-e-dil ke liye ālam-e-gumānī meñ

use pukār rahā huuñ to sun rahā bhī nahīñ

ye kis umiid pe āñkhoñ meñ raqs baaqī hai

tū jā chukā tire aane kā aasrā bhī nahīñ

alag alag sī hai samtoñ kā ab safar darpesh

tumhārā haath mire haath se judā bhī nahīñ

hamīñ se raunaq-e-bāzār-e-ishq qaa.em thī

hamāre baa'd to shahroñ meñ kuchh bachā bhī nahīñ

fazā meñ habs hai jangal udaas lagtā hai

‘ajīb dukh hai parindoñ kā chahchahā bhī nahīñ

zabāñ kī daad magar tere lab talak aa.uuñ

maiñ ek lafz meñ simTī huī du'ā bhī nahīñ

tum ek 'umr kī koshish meñ rā.egāñ guzre

harīm-e-dil meñ charāġh-e-vafā jalā bhī nahīñ

maiñ apne qatl kā ilzām kis ke sar rakkhūñ

yahāñ to mere sivā koī dūsrā bhī nahīñ

samundaron ke safar par hain rahnuma bhi nahin

hum aise logon ki kashti ka naKHuda bhi nahin

yaqin-e-dil ke liye aalam-e-gumani mein

use pukar raha hun to sun raha bhi nahin

ye kis umid pe aankhon mein raqs baqi hai

tu ja chuka tere aane ka aasra bhi nahin

alag alag si hai samton ka ab safar darpesh

tumhaara hath mere hath se juda bhi nahin

hamin se raunaq-e-bazar-e-ishq qaem thi

hamare ba'd to shahron mein kuchh bacha bhi nahin

faza mein habs hai jangal udas lagta hai

‘ajib dukh hai parindon ka chahchaha bhi nahin

zaban ki dad magar tere lab talak aaun

main ek lafz mein simTi hui du'a bhi nahin

tum ek 'umr ki koshish mein raegan guzre

harim-e-dil mein charagh-e-wafa jala bhi nahin

main apne qatl ka ilzam kis ke sar rakkhun

yahan to mere siwa koi dusra bhi nahin