samundaron se kabhi dasht se guzarne mein

samundaroñ se kabhī dasht se guzarne meñ

hue tamām safar zindagī kā karne meñ

bas us ne aa ke zarā aa.ine ko dekhā thā

zarā sī der lagī raushnī bikharne meñ

bichhaḌnā shāḳh se kal bhī hai aur aaj bhī hai

to āñdhiyoñ se bhalā kyā rakhā hai Darne meñ

maiñ be-sabab hī muḳhātab huā darīche se

nahā rahā thā vo yādoñ ke ek jharne meñ

bas ek pal kī tamannā-e-vasl kī ḳhātir

tamām-umr lagā dī ga.ī sañvarne meñ

ye aur baat junūñ ko sukūñ mile mile na mile

tabīb lag to ga.e ek zaḳhm bharne meñ

na jaane saare parinde kahāñ hue ġhā.eb

maza rahā hī nahīñ saa.e meñ Thaharne meñ

samundaron se kabhi dasht se guzarne mein

hue tamam safar zindagi ka karne mein

bas us ne aa ke zara aaine ko dekha tha

zara si der lagi raushni bikharne mein

bichhaDna shaKH se kal bhi hai aur aaj bhi hai

to aandhiyon se bhala kya rakha hai Darne mein

main be-sabab hi muKHatab hua dariche se

naha raha tha wo yaadon ke ek jharne mein

bas ek pal ki tamanna-e-wasl ki KHatir

tamam-umr laga di gai sanwarne mein

ye aur baat junun ko sukun mile mile na mile

tabib lag to gae ek zaKHm bharne mein

na jaane sare parinde kahan hue ghaeb

maza raha hi nahin sae mein Thaharne mein