sanam ke kuche mein chhup ke jaana agarche yun hai KHayal dil ka

sanam ke kūche meñ chhup ke jaanā agarche yuuñ hai ḳhayāl dil kā

pa vo to jaate hī taaḌ legā phir aanā hogā muhāl dil kā

guhar ne ashkoñ ke yaañ nikal kar jhamak dikhā.ī jo apnī har dam

to ham ne jaanā ki motiyoñ se bharā hai pahlū meñ qaal dil kā

kabhī ishārat kabhī lagāvaT kabhī tabassum kabhī takallum

ye tarzeñ Thahreñ to ham se phir ho bhalā jī kyūñkar sambhāl dil kā

vo zulf-e-pur-pech-o-ḳham hai us kī phañsā to niklegā phir na hargiz

hamārā kahnā hai sach are jī tū kaam us se na Daal dil kā

maiñ lahza lahza huuñ khīñch laatā vo phir usī kī taraf hai jaatā

karūñ 'nazīr' us kī fikr maiñ kyā hai ab to mere ye haal dil kā

sanam ke kuche mein chhup ke jaana agarche yun hai KHayal dil ka

pa wo to jate hi taD lega phir aana hoga muhaal dil ka

guhar ne ashkon ke yan nikal kar jhamak dikhai jo apni har dam

to hum ne jaana ki motiyon se bhara hai pahlu mein qal dil ka

kabhi ishaarat kabhi lagawaT kabhi tabassum kabhi takallum

ye tarzen Thahren to hum se phir ho bhala ji kyunkar sambhaal dil ka

wo zulf-e-pur-pech-o-KHam hai us ki phansa to niklega phir na hargiz

hamara kahna hai sach are ji tu kaam us se na Dal dil ka

main lahza lahza hun khinch lata wo phir usi ki taraf hai jata

karun 'nazir' us ki fikr main kya hai ab to mere ye haal dil ka