sanam KHush tabiyan sikhe ho tum kin kin zarifon sin

sanam ḳhush tab.īyāñ sīkhe ho tum kin kin zarīfoñ siiñ

ki ye lutf-e-adā ma.alūm hotā hai latīfoñ siiñ

likhūñ vasf us kī zulfoñ ke qalam kar shāḳh-e-sumbul kuuñ

davātoñ meñ siyāhī bhar gul-e-shabbū kī qīfoñ siiñ

tirī sīdhī nigāheñ in dinoñ meñ garm-e-ulfat haiñ

mujhe saifī lagī hai haat ka.ī vird aur vazīfoñ siiñ

ḳhayāl is kā ham-āġhosh-e-nazar hai saat pardoñ meñ

ajab shoḳhī siiñ pesh aayā hai ye shoḳh un afīfoñ siiñ

kahāñ paa.e maze ke is qadar us ne baḌe koī

tirī āñkhoñ kuuñ sau darje sharāfat hī sharīfoñ siiñ

hujūm-e-bul-havas ke sham.a-e-majlis ho so kyā ma.anī

latīfoñ kuuñ ravā niiñ iḳhtilāt aise kasīfoñ siiñ

mizājeñ nā-muvāfiq hoñ to kab sohbat barār ho.e

nahīñ miltī hamārī tab.a in duniyā ke jīfoñ siiñ

abas mat dekh āñkheñ phaaḌ phaaḌ in chashm-e-ḳhūnīñ kuuñ

paḌā niiñ nargis-e-bāġhī tujhe kaam in harīfoñ siiñ

ḳhas-o-ḳhāshāk-e-rah haiñ ham tire ai sho.ala-ḳhū zālim

munāsib niiñ hai itnī sar-kashī āḳhir za.īfoñ siiñ

subuk rūhān-e-ma.anī bū-e-gul haiñ bāġh-e-irfāñ ke

har ik ḳhār-e-girāñ jaañ kuuñ ḳhabar kyā in latīfoñ siiñ

ġhalat niiñ hai ki bulbul hāfiz-e-sīpāra-e-gul hai

sanad rakhtā huuñ maiñ gul-barg ke rañgīñ sahīfoñ siiñ

raqīb us sañg-dil siiñ muntazir haiñ ham-kalāmī ke

suḳhan kartā hai kab vo koh-e-tamkīñ in ḳhafīfoñ siiñ

savār-e-tausun-e-ma.anī huuñ chaugān-e-tabī.at siiñ

liyā huuñ gū-e-maidān-e-suḳhan meñ ham radīfoñ siiñ

adīb-e-ishq ke shāgird haiñ farhād aur majnūñ

ki koh-o-dasht kā maktab hai garm in do ḳhalīfoñ siiñ

'sirāj' is sham.a kuuñ hai shauq parvāne jalāne kā

duā kar yā ilāhī mom dil ho.e ham najīfoñ siiñ

sanam KHush tabiyan sikhe ho tum kin kin zarifon sin

ki ye lutf-e-ada malum hota hai latifon sin

likhun wasf us ki zulfon ke qalam kar shaKH-e-sumbul kun

dawaton mein siyahi bhar gul-e-shabbu ki qifon sin

teri sidhi nigahen in dinon mein garm-e-ulfat hain

mujhe saifi lagi hai hat kai wird aur wazifon sin

KHayal is ka ham-aghosh-e-nazar hai sat pardon mein

ajab shoKHi sin pesh aaya hai ye shoKH un afifon sin

kahan pae maze ke is qadar us ne baDe koi

teri aankhon kun sau darje sharafat hi sharifon sin

hujum-e-bul-hawas ke shama-e-majlis ho so kya mani

latifon kun rawa nin iKHtilat aise kasifon sin

mizajen na-muwafiq hon to kab sohbat barar hoe

nahin milti hamari taba in duniya ke jifon sin

abas mat dekh aankhen phaD phaD in chashm-e-KHunin kun

paDa nin nargis-e-baghi tujhe kaam in harifon sin

KHas-o-KHashak-e-rah hain hum tere ai shoala-KHu zalim

munasib nin hai itni sar-kashi aaKHir zaifon sin

subuk ruhan-e-mani bu-e-gul hain bagh-e-irfan ke

har ek KHar-e-giran jaan kun KHabar kya in latifon sin

ghalat nin hai ki bulbul hafiz-e-sipara-e-gul hai

sanad rakhta hun main gul-barg ke rangin sahifon sin

raqib us sang-dil sin muntazir hain ham-kalami ke

suKHan karta hai kab wo koh-e-tamkin in KHafifon sin

sawar-e-tausun-e-mani hun chaugan-e-tabiat sin

liya hun gu-e-maidan-e-suKHan mein hum radifon sin

adib-e-ishq ke shagird hain farhad aur majnun

ki koh-o-dasht ka maktab hai garm in do KHalifon sin

'siraj' is shama kun hai shauq parwane jalane ka

dua kar ya ilahi mom dil hoe hum najifon sin