sang-e-jafa ka gham nahin dast-e-talab ka Dar nahin

sañg-e-jafā kā ġham nahīñ dast-e-talab kā Dar nahīñ

apnā hai us par āshiyāñ naḳhl jo bārvar nahīñ

sunte ho ahl-e-qāfila maiñ koī rāhbar nahīñ

dekh rahā huuñ tum meñ se ek bhī raah par nahīñ

maut kā ghar hai āsmāñ is se kahīñ mafar nahīñ

nikleñ to koī dar nahīñ bhāgeñ to rahguzar nahīñ

pahle jigar par aah kā naam na thā nishāñ na thā

āḳhir-e-kār ye huā aah to hai jigar nahīñ

sub.h-e-azal se tā-abad qissa na hogā ye tamām

jaur-e-falak kī dāstāñ aisī bhī muḳhtasar nahīñ

barg-e-ḳhizāñ-rasīda huuñ chheḌ na mujh ko ai nasīm

zauq fuġhāñ kā hai mujhe shikva-e-abr-e-tar nahīñ

munkir-e-hashr hai kidhar dekhe tū aañkh khol kar

hashr kī jo ḳhabar na de aisī koī sahar nahīñ

shabnam o gul ko dekh kar vajd na aa.e kis tarah

ḳhanda be-sabab nahīñ girya be-asar nahīñ

tere faqīr kā ġhurūr tājvaroñ se hai sivā

tarf-e-kulah meñ de shikan us ko ye dard-e-sar nahīñ

koshak o qasr o bām-o-dar tū ne binā kiye to kyā

haif hai ḳhānumāñ-ḳharāb dil meñ kisī ke gher nahīñ

nāla-kashī raqīb se merī tarah muhāl hai

dil nahīñ hausla nahīñ zohra nahīñ jigar nahīñ

shātir-e-pīr-e-āsmāñ vāh-rī terī dastburd

ḳhusrav o kaiqibād kī teġh nahīñ kamar nahīñ

shaan karīm kī ye hai haañ se ho peshtar atā

lutf atā kā kyā ho jab haañ se ho peshtar nahīñ

laakh vo be-ruḳhī kare laakh vo kaj-ravī kare

kuchh to malāl is kā ho dil ko mire magar nahīñ

sun ke burā na māniye sach ko na jhuuT jāniye

zikr hai kuchh gila nahīñ baat hai neshtar nahīñ

sang-e-jafa ka gham nahin dast-e-talab ka Dar nahin

apna hai us par aashiyan naKHl jo barwar nahin

sunte ho ahl-e-qafila main koi rahbar nahin

dekh raha hun tum mein se ek bhi rah par nahin

maut ka ghar hai aasman is se kahin mafar nahin

niklen to koi dar nahin bhagen to rahguzar nahin

pahle jigar par aah ka nam na tha nishan na tha

aaKHir-e-kar ye hua aah to hai jigar nahin

subh-e-azal se ta-abad qissa na hoga ye tamam

jaur-e-falak ki dastan aisi bhi muKHtasar nahin

barg-e-KHizan-rasida hun chheD na mujh ko ai nasim

zauq fughan ka hai mujhe shikwa-e-abr-e-tar nahin

munkir-e-hashr hai kidhar dekhe tu aankh khol kar

hashr ki jo KHabar na de aisi koi sahar nahin

shabnam o gul ko dekh kar wajd na aae kis tarah

KHanda be-sabab nahin girya be-asar nahin

tere faqir ka ghurur tajwaron se hai siwa

tarf-e-kulah mein de shikan us ko ye dard-e-sar nahin

koshak o qasr o baam-o-dar tu ne bina kiye to kya

haif hai KHanuman-KHarab dil mein kisi ke gher nahin

nala-kashi raqib se meri tarah muhaal hai

dil nahin hausla nahin zohra nahin jigar nahin

shatir-e-pir-e-asman wah-ri teri dastburd

KHusraw o kaiqibaad ki tegh nahin kamar nahin

shan karim ki ye hai han se ho peshtar ata

lutf ata ka kya ho jab han se ho peshtar nahin

lakh wo be-ruKHi kare lakh wo kaj-rawi kare

kuchh to malal is ka ho dil ko mere magar nahin

sun ke bura na maniye sach ko na jhuT jaaniye

zikr hai kuchh gila nahin baat hai neshtar nahin