sang ki zad pe sahi aaina-KHane mere

sang kī zad pe sahī ā.ina-ḳhāne mere

hargiz āsān nahīñ 'aks miTāne mere

mujh se milte hī nahīñ yaar purāne mere

kyā unheñ bhuul ga.e saare Thikāne mere

vasl kī shab jo khulīñ band-e-qabā kī girheñ

hosh sab chhīn liye hosh-rubā ne mere

jism kī ḳhaak meñ madfan thā ḳhazīna dil kā

koī aayā hī nahīñ dil ko churāne mere

chhoḌ baiThe ho to ab chhoḌ do pīchhā merā

yaad kyoñ aate ho ab dil ko dukhāne mere

haañ kabhī phuul yā ḳhushbū bhare ḳhat hote the

ab to rahtī haiñ kitābeñ hī sirhāne mere

jaane kis sehr se soyā hai muqaddar yā-rab

bhej qismat kī parī baḳht jagāne mere

us ne chhoḌā na kabhī tarz-e-taġhāful ko 'sahāb'

jis se mansūb hue saare fasāne mere

sang ki zad pe sahi aaina-KHane mere

hargiz aasan nahin 'aks miTane mere

mujh se milte hi nahin yar purane mere

kya unhen bhul gae sare Thikane mere

wasl ki shab jo khulin band-e-qaba ki girhen

hosh sab chhin liye hosh-ruba ne mere

jism ki KHak mein madfan tha KHazina dil ka

koi aaya hi nahin dil ko churane mere

chhoD baiThe ho to ab chhoD do pichha mera

yaad kyon aate ho ab dil ko dukhane mere

han kabhi phul ya KHushbu bhare KHat hote the

ab to rahti hain kitaben hi sirhane mere

jaane kis sehr se soya hai muqaddar ya-rab

bhej qismat ki pari baKHt jagane mere

us ne chhoDa na kabhi tarz-e-taghaful ko 'sahab'

jis se mansub hue sare fasane mere