sar-ba-sar yar ki marzi pe fida ho jaana

sar-ba-sar yaar kī marzī pe fidā ho jaanā

kyā ġhazab kaam hai rāzī-ba-razā ho jaanā

band āñkho vo chale aa.eñ to vā ho jaanā

aur yuuñ phuuT ke ronā ki fanā ho jaanā

ishq meñ kaam nahīñ zor-zabardastī kā

jab bhī tum chāho judā honā judā ho jaanā

terī jānib hai ba-tadrīj taraqqī merī

mere hone kī hai me.arāj tirā ho jaanā

tere aane kī bashārat ke sivā kuchh bhī nahīñ

baaġh meñ sūkhe daraḳhtoñ kā harā ho jaanā

ik nishānī hai kisī shahr kī barbādī kī

nāravā baat kā yak-laḳht ravā ho jaanā

tañg aa jā.ūñ mohabbat se to gaahe gaahe

achchhā lagtā hai mujhe terā ḳhafā ho jaanā

sī diye jaa.eñ mire hoñT to ai jān-e-ġhazal

aisā karnā mirī āñkhoñ se adā ho jaanā

be-niyāzī bhī vahī aur ta.alluq bhī vahī

tumheñ aatā hai mohabbat meñ ḳhudā ho jaanā

azhdahā ban ke rag-o-pai ko jakaḌ letā hai

itnā āsān nahīñ ġham se rihā ho jaanā

achchhe achchhoñ pe bure din haiñ lihāzā 'fāris'

achchhe hone se to achchhā hai burā ho jaanā

sar-ba-sar yar ki marzi pe fida ho jaana

kya ghazab kaam hai raazi-ba-raza ho jaana

band aankho wo chale aaen to wa ho jaana

aur yun phuT ke rona ki fana ho jaana

ishq mein kaam nahin zor-zabardasti ka

jab bhi tum chaho juda hona juda ho jaana

teri jaanib hai ba-tadrij taraqqi meri

mere hone ki hai mearaj tera ho jaana

tere aane ki bashaarat ke siwa kuchh bhi nahin

bagh mein sukhe daraKHton ka hara ho jaana

ek nishani hai kisi shahr ki barbaadi ki

narawa baat ka yak-laKHt rawa ho jaana

tang aa jaun mohabbat se to gahe gahe

achchha lagta hai mujhe tera KHafa ho jaana

si diye jaen mere honT to ai jaan-e-ghazal

aisa karna meri aankhon se ada ho jaana

be-niyazi bhi wahi aur talluq bhi wahi

tumhein aata hai mohabbat mein KHuda ho jaana

azhdaha ban ke rag-o-pai ko jakaD leta hai

itna aasan nahin gham se riha ho jaana

achchhe achchhon pe bure din hain lihaza 'faris'

achchhe hone se to achchha hai bura ho jaana