sar chhupane ke liye chhat nahin di ja sakti

sar chhupāne ke liye chhat nahīñ dī jā saktī

har kisī ko ye sahūlat nahīñ dī jā saktī

saañs lene ke liye sab ko mayassar hai havā

is se baḌh kar to ri.āyat nahīñ dī jā saktī

tum ko raas aa.e na aa.e mirī bastī kī fazā

yaañ kisī jaañ kī zamānat nahīñ dī jā saktī

ek muddat ke shab o roz lahū hote haiñ

tasht meñ rakh ke qayādat nahīñ dī jā saktī

ziist aur maut kā āḳhir ye fasāna kyā hai

umr kyuuñ hasb-e-zarūrat nahīñ dī jā saktī

in darīchoñ se koī mauja-e-ḳhush-kun aa.e

rāhat-e-jāñ ye ijāzat nahīñ dī jā saktī

soz-e-dil tohfa-e-qudrat hai vagarna 'uzma'

barf ko narm harārat nahīñ dī jā saktī

sar chhupane ke liye chhat nahin di ja sakti

har kisi ko ye sahulat nahin di ja sakti

sans lene ke liye sab ko mayassar hai hawa

is se baDh kar to riayat nahin di ja sakti

tum ko ras aae na aae meri basti ki faza

yan kisi jaan ki zamanat nahin di ja sakti

ek muddat ke shab o roz lahu hote hain

tasht mein rakh ke qayaadat nahin di ja sakti

zist aur maut ka aaKHir ye fasana kya hai

umr kyun hasb-e-zarurat nahin di ja sakti

in darichon se koi mauja-e-KHush-kun aae

rahat-e-jaan ye ijazat nahin di ja sakti

soz-e-dil tohfa-e-qudrat hai wagarna 'uzma'

barf ko narm hararat nahin di ja sakti