sar-e-arsh-e-barin hai zer-e-pa-e-pir-e-mai-KHana

sar-e-arsh-e-barīñ hai zer-e-pā-e-pīr-e-mai-ḳhāna

kamāl-e-auj par hai husn-e-ālamgīr-e-mai-ḳhāna

faroġh-e-bāda se raushan huī taqdīr-e-mai-ḳhāna

ki hai har bāda-kash raushan charāġh-e-pīr-e-mai-ḳhāna

maiñ dīvāna huuñ aur dair-o-haram se mujh ko vahshat hai

paḌī rahne do mere paañv meñ zanjīr-e-mai-ḳhāna

tasavvur dil meñ rahtā hai kisī kī chashm-e-mai-gūñ kā

khīñchī rahtī hai āñkhoñ meñ mire tasvīr-e-mai-ḳhāna

ziyārat ko chale haiñ shaiḳh-o-zāhid fī-amānillāh

ḳhudā kī shaan hai kuchh phir ga.ī taqdīr-e-mai-ḳhāna

parī shīshe meñ aur sāġhar meñ hai ḳhurshīd-e-nūrñgīñ

vo hai tasḳhīr-e-mai-ḳhāna ye hai tanvīr-e-mai-ḳhāna

jo pahuñchā mai-kade meñ chhoḌ kar dair-o-haram 'sāhir'

jhukā sar zauq-e-mastī meñ zahe tāsīr-e-mai-ḳhāna

sar-e-arsh-e-barin hai zer-e-pa-e-pir-e-mai-KHana

kamal-e-auj par hai husn-e-alamgir-e-mai-KHana

farogh-e-baada se raushan hui taqdir-e-mai-KHana

ki hai har baada-kash raushan charagh-e-pir-e-mai-KHana

main diwana hun aur dair-o-haram se mujh ko wahshat hai

paDi rahne do mere panw mein zanjir-e-mai-KHana

tasawwur dil mein rahta hai kisi ki chashm-e-mai-gun ka

khinchi rahti hai aankhon mein mere taswir-e-mai-KHana

ziyarat ko chale hain shaiKH-o-zahid fi-amanillah

KHuda ki shan hai kuchh phir gai taqdir-e-mai-KHana

pari shishe mein aur saghar mein hai KHurshid-e-nurngin

wo hai tasKHir-e-mai-KHana ye hai tanwir-e-mai-KHana

jo pahuncha mai-kade mein chhoD kar dair-o-haram 'sahir'

jhuka sar zauq-e-masti mein zahe tasir-e-mai-KHana