sar-e-mahshar yahi puchhunga KHuda se pahle

sar-e-mahshar yahī pūchhūñgā ḳhudā se pahle

tū ne rokā bhī thā mujrim ko ḳhatā se pahle

ashk āñkhoñ meñ haiñ hoñToñ pe bukā se pahle

qāfla-e-ġham kā chalā bāñg-e-darā se pahle

ye to sach hai ki tujhe tark-e-jafā kā haq hai

haañ magar pūñchh to le ahl-e-vafā se pahle

uḌ gayā jaise yakāyak mire shānoñ par se

vo jo ik bojh thā taslīm-e-ḳhatā se pahle

haañ yahī dil jo kisī kā hai ab ā.īna-e-husn

ek patthar thā mohabbat kī jilā se pahle

aañkh jhapkā bhī to de dil ko churāne vaale

ik tabassum nigah-e-hosh-rubā se pahle

lazzat-e-zīst koī us ke muqābil kī nahīñ

vo jo ik kaif sā taarī hai ḳhatā se pahle

ibtidā hī se na de ziist mujhe dars us kā

aur bhī baab to haiñ bāb-e-razā se pahle

dar-e-mai-ḳhāna se aatī hai salā-e-tāza

aaj sairāb kiye jā.eñge pyāse pahle

rāz-e-mai-noshi-e-'mullā' huā ifshā varna

kyā vo mad-mast na thā laġhzish-e-pā se pahle

sar-e-mahshar yahi puchhunga KHuda se pahle

tu ne roka bhi tha mujrim ko KHata se pahle

ashk aankhon mein hain honTon pe buka se pahle

qafla-e-gham ka chala bang-e-dara se pahle

ye to sach hai ki tujhe tark-e-jafa ka haq hai

han magar punchh to le ahl-e-wafa se pahle

uD gaya jaise yakayak mere shanon par se

wo jo ek bojh tha taslim-e-KHata se pahle

han yahi dil jo kisi ka hai ab aaina-e-husn

ek patthar tha mohabbat ki jila se pahle

aankh jhapka bhi to de dil ko churane wale

ek tabassum nigah-e-hosh-ruba se pahle

lazzat-e-zist koi us ke muqabil ki nahin

wo jo ek kaif sa tari hai KHata se pahle

ibtida hi se na de zist mujhe dars us ka

aur bhi bab to hain bab-e-raza se pahle

dar-e-mai-KHana se aati hai sala-e-taza

aaj sairab kiye jaenge pyase pahle

raaz-e-mai-noshi-e-'mulla' hua ifsha warna

kya wo mad-mast na tha laghzish-e-pa se pahle