sar-gashtagi mein aalam-e-hasti se yas hai

sar-gashtagī meñ ālam-e-hastī se yaas hai

taskīñ ko de naved ki marne kī aas hai

letā nahīñ mire dil-e-āvāra kī ḳhabar

ab tak vo jāntā hai ki mere hī paas hai

kiije bayāñ surūr-e-tap-e-ġham kahāñ talak

har mū mire badan pe zabān-e-sipās hai

hai vo ġhurūr-e-husn se begāna-e-vafā

har-chand us ke paas dil-e-haq-shanās hai

pī jis qadar mile shab-e-mahtāb meñ sharāb

is balġhamī-mizāj ko garmī hī raas hai

har ik makān ko hai makīñ se sharaf 'asad'

majnūñ jo mar gayā hai to jañgal udaas hai

kyā ġham hai us ko jis kā 'alī' sā imaam ho

itnā bhī ai falak-zada kyuuñ bad-havās hai

sar-gashtagi mein aalam-e-hasti se yas hai

taskin ko de nawed ki marne ki aas hai

leta nahin mere dil-e-awara ki KHabar

ab tak wo jaanta hai ki mere hi pas hai

kije bayan surur-e-tap-e-gham kahan talak

har mu mere badan pe zaban-e-sipas hai

hai wo ghurur-e-husn se begana-e-wafa

har-chand us ke pas dil-e-haq-shanas hai

pi jis qadar mile shab-e-mahtab mein sharab

is balghami-mizaj ko garmi hi ras hai

har ek makan ko hai makin se sharaf 'asad'

majnun jo mar gaya hai to jangal udas hai

kya gham hai us ko jis ka 'ali' sa imam ho

itna bhi ai falak-zada kyun bad-hawas hai