sar par kisi gharib ke na-chaar gir paDe

sar par kisī ġharīb ke nā-chār gir paḌe

mumkin hai mere sabr kī dīvār gir paḌe

kyā ḳhuub suraḳh-rū hue ham kār-e-ishq meñ

do-chār kaam aa ga.e do-chār gir paḌe

is baar jab ajal se mirā sāmnā huā

kashtī se ḳhvāb haath se patvār gir paḌe

raushan koī charāġh nahīñ naḳhl-e-tūr par

sajde meñ kis ko dekh ke ashjār gir paḌe

kartī hai farsh-e-ḳhāk ko dīvār aa.ina

āñkhoñ se jab ye daulat-e-bedār gir paḌe

is paar dekh kar mujhe ik gul-badan ke saath

jitne mire gulāb the us paar gir paḌe

'sājid' agar aziiz thī apnī anā inheñ

kyā soch kar galī meñ mire yaar gir paḌe

sar par kisi gharib ke na-chaar gir paDe

mumkin hai mere sabr ki diwar gir paDe

kya KHub suraKH-ru hue hum kar-e-ishq mein

do-chaar kaam aa gae do-chaar gir paDe

is bar jab ajal se mera samna hua

kashti se KHwab hath se patwar gir paDe

raushan koi charagh nahin naKHl-e-tur par

sajde mein kis ko dekh ke ashjar gir paDe

karti hai farsh-e-KHak ko diwar aaina

aankhon se jab ye daulat-e-bedar gir paDe

is par dekh kar mujhe ek gul-badan ke sath

jitne mere gulab the us par gir paDe

'sajid' agar aziz thi apni ana inhen

kya soch kar gali mein mere yar gir paDe