sar-ta-ba-qadam ek hasin raaz ka aalam

sar-tā-ba-qadam ek hasīñ raaz kā aalam

allāh re ik fitnagar-e-nāaz kā aalam

zulfoñ meñ vo barsāt kī rātoñ kī javānī

aariz pe vo anvār-e-sahar-sāz kā aalam

unvān-e-soḳhan 'ġhālib' o 'momin' kā taġhazzul

andāz-e-nazar bāda-e-shīrāz kā aalam

duz-dīda nigāhoñ meñ ik ilhām kī duniyā

nāzuk se tabassum meñ ik ejaaz kā aalam

uljhe hue jumloñ meñ sharārat bhī hayā bhī

jazbāt meñ Duubā huā āvāz kā aalam

is sādgi-e-husn meñ kis darja kashish hai

har naaz meñ ik jazba-e-ġhammāz kā aalam

us said ko kyā kahiye jo ḳhud aa.e tah-e-dām

dil meñ liye ik hasrat-e-parvāz kā aalam

yuuñ to na tasāhul na taġhāful na tajāhul

kuchh aur hai us kāfir-e-tannāz kā aalam

shoḳhī meñ sharārat meñ matānat meñ hayā meñ

jo raaz kā aalam thā vahī raaz kā aalam

sar-ta-ba-qadam ek hasin raaz ka aalam

allah re ek fitnagar-e-naaz ka aalam

zulfon mein wo barsat ki raaton ki jawani

aariz pe wo anwar-e-sahar-saz ka aalam

unwan-e-soKHan 'ghaalib' o 'momin' ka taghazzul

andaz-e-nazar baada-e-shiraaz ka aalam

duz-dida nigahon mein ek ilham ki duniya

nazuk se tabassum mein ek ejaz ka aalam

uljhe hue jumlon mein shararat bhi haya bhi

jazbaat mein Duba hua aawaz ka aalam

is sadgi-e-husn mein kis darja kashish hai

har naz mein ek jazba-e-ghammaz ka aalam

us said ko kya kahiye jo KHud aae tah-e-dam

dil mein liye ek hasrat-e-parwaz ka aalam

yun to na tasahul na taghaful na tajahul

kuchh aur hai us kafir-e-tannaz ka aalam

shoKHi mein shararat mein matanat mein haya mein

jo raaz ka aalam tha wahi raaz ka aalam