sarab-e-jism ko sahra-e-jaan mein rakh dena

sarāb-e-jism ko sahrā-e-jāñ meñ rakh denā

zarā sī dhuup bhī is sā.ebāñ meñ rakh denā

tujhe havas ho jo mujh ko hadaf banāne kī

mujhe bhī tiir kī sūrat kamāñ meñ rakh denā

shikast khaa.e hue hausloñ kā lashkar huuñ

uThā ke mujh ko saf-e-dushmanāñ meñ rakh denā

jadīd nasloñ kī ḳhātir ye varsa kaafī hai

mire yaqīñ ko hisār-e-gumāñ meñ rakh denā

ye mauj tā-ki safīne ko garm-rau rakkhe

kuchh aag ḳhema-e-āb-e-ravāñ meñ rakh denā

bahut tavīl hai kaale samundaroñ kā safar

mujhe havā kī jagah bādbāñ meñ rakh denā

maiñ apne zimme kisī kā hisāb kyuuñ rakkhūñ

jo nafā hai use jaib-e-ziyāñ meñ rakh denā

sarab-e-jism ko sahra-e-jaan mein rakh dena

zara si dhup bhi is saeban mein rakh dena

tujhe hawas ho jo mujh ko hadaf banane ki

mujhe bhi tir ki surat kaman mein rakh dena

shikast khae hue hauslon ka lashkar hun

uTha ke mujh ko saf-e-dushmanan mein rakh dena

jadid naslon ki KHatir ye warsa kafi hai

mere yaqin ko hisar-e-guman mein rakh dena

ye mauj ta-ki safine ko garm-rau rakkhe

kuchh aag KHema-e-ab-e-rawan mein rakh dena

bahut tawil hai kale samundaron ka safar

mujhe hawa ki jagah baadban mein rakh dena

main apne zimme kisi ka hisab kyun rakkhun

jo nafa hai use jaib-e-ziyan mein rakh dena