sarapa tera kya qayamat nahin hai?

sarāpā tirā kyā qayāmat nahīñ hai?

idhar hashr sī dil kī hālat nahīñ hai

mohabbat mirī kyā ibādat nahīñ hai

vo ik nuur hai jis kī sūrat nahīñ hai

tire in laboñ ko maiñ tashbīh kyā duuñ?

ki phūloñ meñ aisī nazākat nahīñ hai

hai chāhat kahūñ ruup terā ġhazal maiñ

magar mujh meñ husn-e-ḳhitābat nahīñ hai

bayāñ ho rahī hai jo āñkhoñ se terī

paḌhī maiñ ne aisī hikāyat nahīñ hai

vo jab boltā hai madhur boltā hai

kisī shai meñ aisī halāvat nahīñ hai

maiñ tārīf terī karūñ bhī to kaise?

zabān-o-bayāñ par vo qudrat nahīñ hai

hai 'ālok' merī ġhazal jān-e-mahfil

par us ko jo bhaa.e vo rañgat nahīñ hai

sarapa tera kya qayamat nahin hai?

idhar hashr si dil ki haalat nahin hai

mohabbat meri kya ibaadat nahin hai

wo ek nur hai jis ki surat nahin hai

tere in labon ko main tashbih kya dun?

ki phulon mein aisi nazakat nahin hai

hai chahat kahun rup tera ghazal main

magar mujh mein husn-e-KHitabat nahin hai

bayan ho rahi hai jo aankhon se teri

paDhi main ne aisi hikayat nahin hai

wo jab bolta hai madhur bolta hai

kisi shai mein aisi halawat nahin hai

main tarif teri karun bhi to kaise?

zaban-o-bayan par wo qudrat nahin hai

hai 'alok' meri ghazal jaan-e-mahfil

par us ko jo bhae wo rangat nahin hai