sard aaj-kal is darja zamane ki hawa hai

sard āj-kal is darja zamāne kī havā hai

anjām ke ehsās se dil kaañp rahā hai

vo shakl jo aate hī nazar ho ga.ī ġhā.eb

jaadū hai ki bijlī ki chhalāvā ki balā hai

kashmīr jise kahte haiñ sab ġhairat-e-firdaus

jab tū hī nahīñ hai paas to dozaḳh se sivā hai

kohsār par ye abr ke phirte hue saa.e

ik ālam-e-shādāb tujhe DhūñDh rahā hai

gar bādila sar par hai to maḳhmal hai tah-e-pā

al-qissa ajab manzar-e-pur-zeb-o-ziyā hai

aa aur mirī chashm-e-tasavvur meñ samā jā

ā.īna tirā der se be-aks paḌā hai

ai 'fauq' maiñ huuñ is liye muhtāj-e-rifāqat

tanhā rah-e-manzil meñ koī chhoḌ gayā hai

sard aaj-kal is darja zamane ki hawa hai

anjam ke ehsas se dil kanp raha hai

wo shakl jo aate hi nazar ho gai ghaeb

jadu hai ki bijli ki chhalawa ki bala hai

kashmir jise kahte hain sab ghairat-e-firdaus

jab tu hi nahin hai pas to dozaKH se siwa hai

kohsar par ye abr ke phirte hue sae

ek aalam-e-shadab tujhe DhunDh raha hai

gar baadila sar par hai to maKHmal hai tah-e-pa

al-qissa ajab manzar-e-pur-zeb-o-ziya hai

aa aur meri chashm-e-tasawwur mein sama ja

aaina tera der se be-aks paDa hai

ai 'fauq' main hun is liye muhtaj-e-rifaqat

tanha rah-e-manzil mein koi chhoD gaya hai