sard ho jati hai fikr-e-jah-e-duniya jis ke baad

sard ho jaatī hai fikr-e-jāh-e-duniyā jis ke ba.ad

vo zarā sā hai ḳhayāl ai dil ki phir kyā is ke ba.ad

dil ba-mushkil āstān-e-but ke sajdoñ se phirā

sar uThāyā to sahī lekin baḌī ghis ghis ke ba.ad

be-ḳhudī aa.ī thī un ke ba.ad bazm-e-nāz meñ

phir nahīñ ma.alūm ham ko kaun aayā kis ke ba.ad

ḳhūn-e-dil hī par masā.ib kaash ho jaate tamām

dekhnā ye hai ki honā aur kyā hai is ke ba.ad

ḳhud ko pahchāne to insāñ kyuuñ rahe pāband-e-ġhair

ye kamāl-e-be-hayā.ī hai zavāl-e-his ke ba.ad

koī jaatā hai to jaa.e kis ko parvā hai yahāñ

bazm-e-ālam ye kaho suunī huī hai kis ke ba.ad

kho diyā shohrat ne apnī sher-ḳhvānī kā mazā

daad mil jaatī hai 'nātiq' har ratab-yābis ke ba.ad

sard ho jati hai fikr-e-jah-e-duniya jis ke baad

wo zara sa hai KHayal ai dil ki phir kya is ke baad

dil ba-mushkil aastan-e-but ke sajdon se phira

sar uThaya to sahi lekin baDi ghis ghis ke baad

be-KHudi aai thi un ke baad bazm-e-naz mein

phir nahin malum hum ko kaun aaya kis ke baad

KHun-e-dil hi par masaib kash ho jate tamam

dekhna ye hai ki hona aur kya hai is ke baad

KHud ko pahchane to insan kyun rahe paband-e-ghair

ye kamal-e-be-hayai hai zawal-e-his ke baad

koi jata hai to jae kis ko parwa hai yahan

bazm-e-alam ye kaho suni hui hai kis ke baad

kho diya shohrat ne apni sher-KHwani ka maza

dad mil jati hai 'natiq' har ratab-yabis ke baad