sargarm-e-tamasha tha dil mahw-e-ada barson

sargarm-e-tamāsha thā dil mahv-e-adā barsoñ

samjhā hī nahīñ nādāñ mafhūm-e-vafā barsoñ

āshufta-mizāj āḳhir jaa.eñ to kahāñ jaa.eñ

har gaam pe yāroñ ne dhokā hī diyā barsoñ

ik baar guzartā hai dil dard kī rāhoñ se

rag rag se taḌaptī hai tāsīr-e-duā barsoñ

vo ālam-e-madhoshī vo mastī-e-rindāna

gul-rañg javānī thī kyā hosh-rubā barsoñ

āġhosh-e-tasavvur meñ sau baar go aate haiñ

lekin na qarīb aa.e vo jān-e-hayā barsoñ

go 'mīr' ke nāloñ meñ tāsīr-e-junūñ kam thī

aisā bhī kahāñ hogā ab sho.ala-navā barsoñ

sargarm-e-tamasha tha dil mahw-e-ada barson

samjha hi nahin nadan mafhum-e-wafa barson

aashufta-mizaj aaKHir jaen to kahan jaen

har gam pe yaron ne dhoka hi diya barson

ek bar guzarta hai dil dard ki rahon se

rag rag se taDapti hai tasir-e-dua barson

wo aalam-e-madhoshi wo masti-e-rindana

gul-rang jawani thi kya hosh-ruba barson

aaghosh-e-tasawwur mein sau bar go aate hain

lekin na qarib aae wo jaan-e-haya barson

go 'mir' ke nalon mein tasir-e-junun kam thi

aisa bhi kahan hoga ab shoala-nawa barson