sarshaar hun sarshaar hai duniya mere aage

sarshār huuñ sarshār hai duniyā mire aage

kaunain hai ik larzish-e-sahbā mire aage

har najm hai ik āriz-e-raushan mire nazdīk

har zarra hai ik dīda-e-bīnā mire aage

har jaam hai nazzāra-e-kausar mire haq meñ

har gaam hai gulgasht-e-musallā mire aage

har phuul hai lāl-e-shakar-afshāñ kī hikāyat

har ġhuncha hai ik harf-e-tamannā mire aage

ik maz.haka hai pursish-e-uqbā mire nazdīk

ik vahm hai andesha-e-fardā mire aage

hoñ kitnī hī tārīk shab-e-zīst kī rāheñ

ik nuur sā rahtā hai jhalaktā mire aage

maiñ aur Darūñ saulat-e-duniyā-e-danī se

ḳhud larza-bar-andām hai duniyā mire aage

jhuktā hai ba-sad ijz kalīsā mire dar par

aatā hai laraztā huā kaaba mire aage

paimāne se jis vaqt chhalak jaatī hai sahbā

lahrātā hai ik husn kā dariyā mire aage

jab chāñd jhamaktā hai mire sāġhar-e-zar meñ

chaltā nahīñ ḳhurshīd kā daavā mire aage

jab jhuum ke miinā ko uThātā huuñ ghaTā meñ

hiltā hai sar-e-gumbad-e-mīnā mire aage

aatī hai dulhan ban ke mashiyyat kī jilau meñ

āvārgri-e-ādam-o-havvā mire aage

paimāne pe jis vaqt jhukātā huuñ surāhī

jhuktā hai sar-e-ālam-e-bālā mire aage

pahlū meñ hai ik zohra-jabīñ haath meñ sāġhar

is vaqt na duniyā hai na uqbā mire aage

'josh' uThtī hai dushman kī nazar jab mirī jānib

khultā hai mohabbat kā darīchā mire aage

sarshaar hun sarshaar hai duniya mere aage

kaunain hai ek larzish-e-sahba mere aage

har najm hai ek aariz-e-raushan mere nazdik

har zarra hai ek dida-e-bina mere aage

har jam hai nazzara-e-kausar mere haq mein

har gam hai gulgasht-e-musalla mere aage

har phul hai lal-e-shakar-afshan ki hikayat

har ghuncha hai ek harf-e-tamanna mere aage

ek mazhaka hai pursish-e-uqba mere nazdik

ek wahm hai andesha-e-farda mere aage

hon kitni hi tarik shab-e-zist ki rahen

ek nur sa rahta hai jhalakta mere aage

main aur Darun saulat-e-duniya-e-dani se

KHud larza-bar-andam hai duniya mere aage

jhukta hai ba-sad ijz kalisa mere dar par

aata hai larazta hua kaba mere aage

paimane se jis waqt chhalak jati hai sahba

lahraata hai ek husn ka dariya mere aage

jab chand jhamakta hai mere saghar-e-zar mein

chalta nahin KHurshid ka dawa mere aage

jab jhum ke mina ko uThata hun ghaTa mein

hilta hai sar-e-gumbad-e-mina mere aage

aati hai dulhan ban ke mashiyyat ki jilau mein

aawargri-e-adam-o-hawwa mere aage

paimane pe jis waqt jhukata hun surahi

jhukta hai sar-e-alam-e-baala mere aage

pahlu mein hai ek zohra-jabin hath mein saghar

is waqt na duniya hai na uqba mere aage

'josh' uThti hai dushman ki nazar jab meri jaanib

khulta hai mohabbat ka daricha mere aage