sarw-e-gulshan par suKHan us qad ka baala ho gaya

sarv-e-gulshan par suḳhan us qad kā baalā ho gayā

har nihāl is sharm siiñ jañgal kā paalā ho gayā

aavtā hai ye bahā ho aañkh señ dāman talak

tifl-e-ashk is āj-kal meñ kyā jvālā ho gayā

jab siiñ us almās kī pahuñchī kā hai aañsū meñ aks

tab siiñ har tār-e-falak hīroñ kā maalā ho gayā

dil jigar kī phakaḌiyāñ aahoñ ke tāroñ meñ piro

baiTh kar dokān-e-ġham par phuul vaalā ho gayā

ashk-e-bārāñ aah bijlī ashk kī kaalī ghaTā

māh-rū ban kis tarah kā barshgālā ho gayā

baaġh meñ sarmā thā aur thī yād-e-dildār-e-do-rañg

mujh kuuñ har barg-e-gul-e-ra.anā doshālā ho gayā

niiñd siiñ khul ga.iiñ mirī āñkheñ so dekhā yaar kuuñ

yā añdhārā is qadar thā yā ujālā ho gayā

hijr kī maTh meñ tasavvur us ġhazālī chashm kā

ishq ke bairāgiyoñ ko mirg-chhālā ho gayā

bhar rahā hai bas ki dūd-e-āh merā ai 'sirāj'

āsmāñ jiyūñ parda-e-fānūs kaalā ho gayā

sarw-e-gulshan par suKHan us qad ka baala ho gaya

har nihaal is sharm sin jangal ka pala ho gaya

aawta hai ye baha ho aankh sen daman talak

tifl-e-ashk is aaj-kal mein kya jwala ho gaya

jab sin us almas ki pahunchi ka hai aansu mein aks

tab sin har tar-e-falak hiron ka mala ho gaya

dil jigar ki phakaDiyan aahon ke taron mein piro

baiTh kar dokan-e-gham par phul wala ho gaya

ashk-e-baran aah bijli ashk ki kali ghaTa

mah-ru ban kis tarah ka barshgala ho gaya

bagh mein sarma tha aur thi yaad-e-dildar-e-do-rang

mujh kun har barg-e-gul-e-rana doshaala ho gaya

nind sin khul gain meri aankhen so dekha yar kun

ya andhaara is qadar tha ya ujala ho gaya

hijr ki maTh mein tasawwur us ghazali chashm ka

ishq ke bairagiyon ko mirg-chhaala ho gaya

bhar raha hai bas ki dud-e-ah mera ai 'siraj'

aasman jiyun parda-e-fanus kala ho gaya