sau bar tum to samne aa kar chale gae

sau baar tum to sāmne aa kar chale ga.e

dhokā sā ek ham ko dikhā kar chale ga.e

kī ham se bāġhbāñ ne ye kāvish ki āḳhirash

ham āshiyāñ ko aag lagā kar chale ga.e

hone diyā na mujh se tumheñ sharm ne do-chār

jab mil ga.e to sar ko jhukā kar chale ga.e

aatā huā jo duur se dekhā mujhe to ve

raste meñ mujh se muñh ko chhupā kar chale ga.e

ab maiñ huuñ aur vo zulf hai yārān-e-be-vafā

dām-e-balā meñ mujh ko phañsā kar chale ga.e

Thokar se apne paañv ke gulshan meñ ḳhush-qadāñ

sad fitna-hā-e-ḳhufta jagā kar chale ga.e

hai ġhair se bhī rabt tumheñ maiñ jo ye kahā

saugand mere sar kī vo khā kar chale ga.e

aa.e kabhī jo baaġh meñ dīvāngān-e-dasht

āñkhoñ se jū-e-ḳhūn bahā kar chale ga.e

hargiz rahā na un kā nishāñ vo jo 'mus.hafī'

qasr-o-mahal zamīñ pe banā kar chale ga.e

sau bar tum to samne aa kar chale gae

dhoka sa ek hum ko dikha kar chale gae

ki hum se baghban ne ye kawish ki aaKHirash

hum aashiyan ko aag laga kar chale gae

hone diya na mujh se tumhein sharm ne do-chaar

jab mil gae to sar ko jhuka kar chale gae

aata hua jo dur se dekha mujhe to we

raste mein mujh se munh ko chhupa kar chale gae

ab main hun aur wo zulf hai yaran-e-be-wafa

dam-e-bala mein mujh ko phansa kar chale gae

Thokar se apne panw ke gulshan mein KHush-qadan

sad fitna-ha-e-KHufta jaga kar chale gae

hai ghair se bhi rabt tumhein main jo ye kaha

saugand mere sar ki wo kha kar chale gae

aae kabhi jo bagh mein diwangan-e-dasht

aankhon se ju-e-KHun baha kar chale gae

hargiz raha na un ka nishan wo jo 'mushafi'

qasr-o-mahal zamin pe bana kar chale gae