sau hath uThe karb ki KHushbu ko churane

sau haath uThe karb kī ḳhushbū ko churāne

kyā zaḳhm lagā.e haiñ mire tan pe havā ne

raste meñ koī peḌ jo mil jaa.e to baiThūñ

vo baar uThāyā hai ki dikhne lage shāne

āñkhoñ meñ basī thī tire chehre kī tamāzat

chalne na diyā raah meñ zanjīr-e-sadā ne

chehre the ki marqad kī tarah nauha-ba-lab the

kyā kyā na rulāyā mujhe mānūs fazā ne

naġhmoñ ke ta.āqub meñ na jaao ki abhī tak

insāñ ko mayassar hī nahīñ hoñT hilāne

kyuuñ itne pareshān ho unvāñ kī talab meñ

kirdār mukammal ho to bante haiñ fasāne

āñkhoñ ke jharokoñ se kise DhūñD rahe ho

har naqsh miTā Daalā hai sahrā kī havā ne

duniyā meñ yahī soch ke zinda huuñ maiñ 'afzal'

ehsās to baḳhshā hai mujhe mere ḳhudā ne

sau hath uThe karb ki KHushbu ko churane

kya zaKHm lagae hain mere tan pe hawa ne

raste mein koi peD jo mil jae to baiThun

wo bar uThaya hai ki dikhne lage shane

aankhon mein basi thi tere chehre ki tamazat

chalne na diya rah mein zanjir-e-sada ne

chehre the ki marqad ki tarah nauha-ba-lab the

kya kya na rulaya mujhe manus faza ne

naghmon ke taaqub mein na jao ki abhi tak

insan ko mayassar hi nahin honT hilane

kyun itne pareshan ho unwan ki talab mein

kirdar mukammal ho to bante hain fasane

aankhon ke jharokon se kise DhunD rahe ho

har naqsh miTa Dala hai sahra ki hawa ne

duniya mein yahi soch ke zinda hun main 'afzal'

ehsas to baKHsha hai mujhe mere KHuda ne