sauda-e-ishq ke to KHata-war hum nahin

saudā-e-ishq ke to ḳhatā-vār ham nahīñ

haiñ ishq ke marīz gunahgār ham nahīñ

ham jo khaTak rahe the tumhārī nigāh meñ

lo ab tumhārī raah meñ dīvār ham nahīñ

us kī ḳhushī ke vāste ḳhud ko fanā kiyā

phir bhī vo kah rahā hai vafādār ham nahīñ

dil meñ hamāre ek talātum sā hai bapā

ḳhāmosh haiñ ki zīnat-e-aḳhbār ham nahīñ

tanhā.iyoñ kī ham ne hī duniyā basā.ī hai

goshe meñ ḳhud ke haiñ sar-e-bāzār ham nahīñ

sahrā ke gard-o-garm hī ab raas aa ga.e

'sīmā' kisī chaman ke ravādār ham nahīñ

sauda-e-ishq ke to KHata-war hum nahin

hain ishq ke mariz gunahgar hum nahin

hum jo khaTak rahe the tumhaari nigah mein

lo ab tumhaari rah mein diwar hum nahin

us ki KHushi ke waste KHud ko fana kiya

phir bhi wo kah raha hai wafadar hum nahin

dil mein hamare ek talatum sa hai bapa

KHamosh hain ki zinat-e-aKHbar hum nahin

tanhaiyon ki hum ne hi duniya basai hai

goshe mein KHud ke hain sar-e-bazar hum nahin

sahra ke gard-o-garm hi ab ras aa gae

'sima' kisi chaman ke rawadar hum nahin