sawad-e-shauq-o-talab gham ka bab aisa tha

savād-e-shauq-o-talab ġham kā baab aisā thā

jalā ke ḳhaak kiyā iztirāb aisā thā

bahut hī talḳh thā ya.anī sharāb aisā thā

savāl yaad nahīñ hai javāb aisā thā

tamāzatoñ ne ġham-e-hijr kī ujaaḌ diyā

badan thā phuul sā chehra kitāb aisā thā

maiñ kaañp kaañp gayā huuñ ba-nāme--sūd-o-ziyāñ

shumār-e-zaḳhm-e-hunar kā javāb aisā thā

sulag rahe the mire hoñT jal rahā thā badan

zabāñ se kuchh na kahā thā hijāb aisā thā

mirī talab hī banī mere paañv kī zanjīr

bhaTak rahā huuñ maiñ ab tak sarāb aisā thā

jhulas ke rah gayā chehra tamām ḳhvāboñ kā

ḳhumār-e-tishna-labī kā azaab aisā thā

vo ahd-e-gumrahī kahtā hai us kī marzī hai

jo dekh le tū taḌap jaa.e ḳhvāb aisā thā

bahut hī zo.am thā apnī mohabbatoñ pe use

nibhā sakā na vafā kāmyāb aisā thā

rafāqatoñ kā fusūñ TūTnā hī thā 'vijdān'

safar meñ chhoḌ gayā hai ḳharāb aisā thā

sawad-e-shauq-o-talab gham ka bab aisa tha

jala ke KHak kiya iztirab aisa tha

bahut hi talKH tha yani sharab aisa tha

sawal yaad nahin hai jawab aisa tha

tamazaton ne gham-e-hijr ki ujaD diya

badan tha phul sa chehra kitab aisa tha

main kanp kanp gaya hun ba-name--sud-o-ziyan

shumar-e-zaKHm-e-hunar ka jawab aisa tha

sulag rahe the mere honT jal raha tha badan

zaban se kuchh na kaha tha hijab aisa tha

meri talab hi bani mere panw ki zanjir

bhaTak raha hun main ab tak sarab aisa tha

jhulas ke rah gaya chehra tamam KHwabon ka

KHumar-e-tishna-labi ka azab aisa tha

wo ahd-e-gumrahi kahta hai us ki marzi hai

jo dekh le tu taDap jae KHwab aisa tha

bahut hi zoam tha apni mohabbaton pe use

nibha saka na wafa kaamyab aisa tha

rafaqaton ka fusun TuTna hi tha 'wijdan'

safar mein chhoD gaya hai KHarab aisa tha