sawal-e-subh-e-chaman zulmat-e-KHizan se uTha

savāl-e-sub.h-e-chaman zulmat-e-ḳhizāñ se uThā

ye nafa.a kam to nahīñ hai jo is ziyāñ se uThā

safīna-rāni-e-mahtāb dekhtā koī

ki ik talātum-e-zau jū-e-kahkashāñ se uThā

ġhubār-e-māh ki maqsūm thā ḳhalāoñ kā

bikhar gayā to tire sañg-e-āstāñ se uThā

ġham-e-zamāna tire naaz kyā uThā.ūñgā

ki nāz-e-dost bhī kam mujh se sargirāñ se uThā

mire habīb bahut kam-sabāt hai duniyā

mire habīb bas ab haath imtihāñ se uThā

bayān-e-laġhzish-e-ādam na kar ki vo fitna

mirī zamīñ se nahīñ tere āsmāñ se uThā

kahāñ chale ho liye naqd-e-jān-o-dil 'sahbā'

ki kārobār-e-vafā shahr-e-dil-barāñ se uThā

sawal-e-subh-e-chaman zulmat-e-KHizan se uTha

ye nafa kam to nahin hai jo is ziyan se uTha

safina-rani-e-mahtab dekhta koi

ki ek talatum-e-zau ju-e-kahkashan se uTha

ghubar-e-mah ki maqsum tha KHalaon ka

bikhar gaya to tere sang-e-astan se uTha

gham-e-zamana tere naz kya uThaunga

ki naz-e-dost bhi kam mujh se sargiran se uTha

mere habib bahut kam-sabaat hai duniya

mere habib bas ab hath imtihan se uTha

bayan-e-laghzish-e-adam na kar ki wo fitna

meri zamin se nahin tere aasman se uTha

kahan chale ho liye naqd-e-jaan-o-dil 'sahba'

ki karobar-e-wafa shahr-e-dil-baran se uTha