sawal kya karun tujhse gunahgar hun main

savāl kyā karūñ tujh se gunāhgār huuñ maiñ

nigāh chaar ho kyūñ-kar ki sharmsār huuñ maiñ

ravāna rakh ki jahāñ meñ zalīl-o-ḳhvār huuñ maiñ

jo huuñ so huuñ pa tire dar kā ḳhāksār huuñ maiñ

paḌā huā huuñ butoñ kī galī meñ dil thāme

sabā sambhal ke zarā chal nahīf-o-zār huuñ maiñ

kasī se matlab-e-dil merā hal nahīñ hotā

savāl-e-mas.ala-e-jabr-o-iḳhtiyār huuñ maiñ

jafā-o-zulm us ke gilā karūñ kyūñ-kar

sitam-shi.ār hai vo aur vafā-shi.ār huuñ maiñ

tumhīñ batāo kare sabr kab talak koī

na har kasī se hañso tum na ashk-bār huuñ maiñ

isī ko kahte haiñ yā-rab nasīb kī yaarī

ki yaar vo bhī na ho aur be-dayār huuñ maiñ

vafā kā lutf mile gar hazār jāneñ hoñ

nisār tujh pe mirī jaañ hazār baar huuñ maiñ

zabāñ ho band zabāñ se agar savāl karūñ

qalam hoñ haath agar mudda.ā-nigār huuñ maiñ

ilāhī jazb-e-mohabbat meñ de asar itnā

kaleja thaam le vo bhī jo be-qarār huuñ maiñ

hazār apnī kahūñ us kī ek bhī na sunūñ

ḳhudā vo din kare us se kahīñ do-chār huuñ maiñ

maiñ mast-e-bāda-e-hubb-e-alī huuñ ai 'anjum'

kabhī bahak na sake jo vo bāda-ḳhvār huuñ maiñ

sawal kya karun tujh se gunahgar hun main

nigah chaar ho kyun-kar ki sharmsar hun main

rawana rakh ki jahan mein zalil-o-KHwar hun main

jo hun so hun pa tere dar ka KHaksar hun main

paDa hua hun buton ki gali mein dil thame

saba sambhal ke zara chal nahif-o-zar hun main

kasi se matlab-e-dil mera hal nahin hota

sawal-e-masala-e-jabr-o-iKHtiyar hun main

jafa-o-zulm us ke gila karun kyun-kar

sitam-shiar hai wo aur wafa-shiar hun main

tumhin batao kare sabr kab talak koi

na har kasi se hanso tum na ashk-bar hun main

isi ko kahte hain ya-rab nasib ki yari

ki yar wo bhi na ho aur be-dayar hun main

wafa ka lutf mile gar hazar jaanen hon

nisar tujh pe meri jaan hazar bar hun main

zaban ho band zaban se agar sawal karun

qalam hon hath agar muddaa-nigar hun main

ilahi jazb-e-mohabbat mein de asar itna

kaleja tham le wo bhi jo be-qarar hun main

hazar apni kahun us ki ek bhi na sunun

KHuda wo din kare us se kahin do-chaar hun main

main mast-e-baada-e-hubb-e-ali hun ai 'anjum'

kabhi bahak na sake jo wo baada-KHwar hun main