kisi surat bhi nind aati nahin main kaise so jaun

kisī sūrat bhī niiñd aatī nahīñ maiñ kaise so jā.ūñ

koī shai dil ko bahlātī nahīñ maiñ kaise so jā.ūñ

akelā pā ke mujh ko yaad un kī aa to jaatī hai

magar phir lauT kar jaatī nahīñ maiñ kaise so jā.ūñ

jo ḳhvāboñ meñ mire aa kar tasallī mujh ko detī thī

vo sūrat ab nazar aatī nahīñ maiñ kaise so jā.ūñ

tumhīñ to ho shab-e-ġham meñ jo merā saath dete ho

sitāro tum ko niiñd aatī nahīñ maiñ kaise so jā.ūñ

jise apnā samajhnā thā vo aañkh ab apnī dushman hai

ki ye rone se baaz aatī nahīñ maiñ kaise so jā.ūñ

tirī tasvīr jo TuuTe hue dil kā sahārā thī

nazar vo saaf ab aatī nahīñ maiñ kaise so jā.ūñ

ghaTā jo dil se uThtī hai mizha tak aa to jaatī hai

magar aañkh us ko barsātī nahīñ maiñ kaise so jā.ūñ

sitāre ye ḳhabar laa.e ki ab vo bhī pareshāñ haiñ

sunā hai un ko niiñd aatī nahīñ maiñ kaise so jā.ūñ

kisi surat bhi nind aati nahin main kaise so jaun

koi shai dil ko bahlati nahin main kaise so jaun

akela pa ke mujh ko yaad un ki aa to jati hai

magar phir lauT kar jati nahin main kaise so jaun

jo KHwabon mein mere aa kar tasalli mujh ko deti thi

wo surat ab nazar aati nahin main kaise so jaun

tumhin to ho shab-e-gham mein jo mera sath dete ho

sitaro tum ko nind aati nahin main kaise so jaun

jise apna samajhna tha wo aankh ab apni dushman hai

ki ye rone se baz aati nahin main kaise so jaun

teri taswir jo TuTe hue dil ka sahaara thi

nazar wo saf ab aati nahin main kaise so jaun

ghaTa jo dil se uThti hai mizha tak aa to jati hai

magar aankh us ko barsati nahin main kaise so jaun

sitare ye KHabar lae ki ab wo bhi pareshan hain

suna hai un ko nind aati nahin main kaise so jaun