shamshir meri, meri sipar kis ke pas hai

shamshīr merī, merī sipar kis ke paas hai

do merā ḳhuud par mirā sar kis ke paas hai

darpesh ek kaam hai himmat kā sāthiyo

kasnā hai mujh ko merī kamar kis ke paas hai

taarī ho mujh pe kaun sī hālat mujhe batāo

merā hisāb-e-naf-o-zarar kis ke paas hai

ai ahl-e-shahr maiñ to duā-go-e-shahr huuñ

lab par mire duā hai asar kis ke paas hai

dād-o-sitad ke shahr meñ hone ko aa.ī shaam

ḳhvāhish hai mere paas ḳhabar kis ke paas hai

pur-hāl huuñ pa sūrat-e-ahvāl kuchh nahīñ

hairat hai mere paas nazar kis ke paas hai

ik āftāb hai mirī jeb-e-nigāh meñ

pahnā.ī-e-numūd-e-sahar kis ke paas hai

qissa kishor kā nahīñ koshak kā hai ki hai

darvāza sab ke paas hai ghar kis ke paas hai

mehmān-e-qasr haiñ hameñ kuchh ramz chāhiyeñ

ye pūchh ke batāo khañDar kis ke paas hai

uthlā sā nāf-pyāla hamārī nahīñ talāsh

ai laḌkiyo! batāo bhañvar kis ke paas hai

nāḳhun baḌhe hue haiñ mire mujh se kar hazar

ye jā ke dekh nail-cutter kis ke paas hai

shamshir meri, meri sipar kis ke pas hai

do mera KHud par mera sar kis ke pas hai

darpesh ek kaam hai himmat ka sathiyo

kasna hai mujh ko meri kamar kis ke pas hai

tari ho mujh pe kaun si haalat mujhe batao

mera hisab-e-naf-o-zarar kis ke pas hai

ai ahl-e-shahr main to dua-go-e-shahr hun

lab par mere dua hai asar kis ke pas hai

dad-o-sitad ke shahr mein hone ko aai sham

KHwahish hai mere pas KHabar kis ke pas hai

pur-haal hun pa surat-e-ahwal kuchh nahin

hairat hai mere pas nazar kis ke pas hai

ek aaftab hai meri jeb-e-nigah mein

pahnai-e-numud-e-sahar kis ke pas hai

qissa kishor ka nahin koshak ka hai ki hai

darwaza sab ke pas hai ghar kis ke pas hai

mehman-e-qasr hain hamein kuchh ramz chahiyen

ye puchh ke batao khanDar kis ke pas hai

uthla sa naf-pyala hamari nahin talash

ai laDkiyo! batao bhanwar kis ke pas hai

naKHun baDhe hue hain mere mujh se kar hazar

ye ja ke dekh nail-cutter kis ke pas hai