sayyaad dam-e-zulf se mujhko riha kare

sayyād dām-e-zulf se mujh ko rihā kare

vo din tamām umr na aa.e ḳhudā kare

le de ke rah gayā hai yahī ek aasrā

aisā kabhī na ho ki vo tark-e-vafā kare

mujh be-navā ke naaz uThā.e vo nāznīñ

sultān aur kāvish-e-qurb-e-gadā kare

dāmān-e-bū-e-kākul-e-shab rañg chhoḌ de

yā rab kabhī ye zulm na bād-e-sabā kare

jis ke maraz pe sehat-e-ālam nisār ho

kis tarah vo marīz duā-e-shifā kare

but jis pe multafit ho ba-hadd-e-supurdagī

zindīq hai agar vo ḳhudā se duā kare

umr-e-darāz o puḳhtagi-e-fikr-e-nukta-sañj

kahtī hai ḳhaam kaam mujhe haañ kahā kare

us rū-e-dil-nashīñ pe nigāheñ jamī rahīñ

fariyād kar rahī hai basīrat ki kyā kare

ab dām-e-husn-o-ishq se niklūñ na tā-ba marg

ghar jal rahā hai aql-e-rasā kā jalā kare

hikmat namak-harām huuñ be-shak tirā magar

jis par paḌe ye vaqt vo bechārā kyā kare

yā rab hisār-e-najd se ab uTh sake na 'josh'

yūnān de rahā hai duhā.ī diyā kare

sayyaad dam-e-zulf se mujh ko riha kare

wo din tamam umr na aae KHuda kare

le de ke rah gaya hai yahi ek aasra

aisa kabhi na ho ki wo tark-e-wafa kare

mujh be-nawa ke naz uThae wo naznin

sultan aur kawish-e-qurb-e-gada kare

daman-e-bu-e-kakul-e-shab rang chhoD de

ya rab kabhi ye zulm na baad-e-saba kare

jis ke maraz pe sehat-e-alam nisar ho

kis tarah wo mariz dua-e-shifa kare

but jis pe multafit ho ba-hadd-e-supurdagi

zindiq hai agar wo KHuda se dua kare

umr-e-daraaz o puKHtagi-e-fikr-e-nukta-sanj

kahti hai KHam kaam mujhe han kaha kare

us ru-e-dil-nashin pe nigahen jami rahin

fariyaad kar rahi hai basirat ki kya kare

ab dam-e-husn-o-ishq se niklun na ta-ba marg

ghar jal raha hai aql-e-rasa ka jala kare

hikmat namak-haram hun be-shak tera magar

jis par paDe ye waqt wo bechaara kya kare

ya rab hisar-e-najd se ab uTh sake na 'josh'

yunan de raha hai duhai diya kare