saza hi baad is ke kya milegi zindagi mein

sazā hī baad is ke kyā milegī zindagī meñ

mirī hī zindagī merī nahīñ thī zindagī meñ

tū avval hai yahāñ aisā nahīñ hai ai musāfir

ka.ī guzre haiñ rāh-e-dil se merī zindagī meñ

bichhaḌ kar ho gayā hai tīsrā ab saal ham ko

so ye bhī jhuuT thā bas chaar din hī zindagī meñ

dhaḌaktī hai tū ab bhī siina meñ jaañ dil kī sūrat

to vo shai kyā thī jo har baar TuuTī zindagī meñ

use kahnā ki ab bhī maiñ nahīñ rahtā huuñ tanhā

udāsī naam kī hai ek laḌkī zindagī meñ

saza hi baad is ke kya milegi zindagi mein

meri hi zindagi meri nahin thi zindagi mein

tu awwal hai yahan aisa nahin hai ai musafir

kai guzre hain rah-e-dil se meri zindagi mein

bichhaD kar ho gaya hai tisra ab sal hum ko

so ye bhi jhuT tha bas chaar din hi zindagi mein

dhaDakti hai tu ab bhi sina mein jaan dil ki surat

to wo shai kya thi jo har bar TuTi zindagi mein

use kahna ki ab bhi main nahin rahta hun tanha

udasi nam ki hai ek laDki zindagi mein