sehat achchhi na ho to zulf-e-niswani se bachna

sehat achchhī na ho to zulf-e-nisvānī se bachnā

fishār-e-ḳhūñ ke hamle meñ namak-dānī se bachnā

na ho income to bachchoñ kī farāvānī se bachnā

ġharībī meñ faroġh-e-nasl-e-insānī se bachnā

bahut mushkil hai begam kī nigahbānī se bachnā

samundar meñ bhī rahnā aur tuġhyānī se bachnā

guzishta ahd meñ dhoka bahut khāyā hai tum ne

magar is baar 'zardārī' o 'gīlānī' se bachnā

ḳhudā tum ko vazīr-e-bijlī-o-pānī banā de

to phir tum sārafīn-e-bijlī-o-pānī se bachnā

ḳhudā ke ghar meñ visa-card kā system nahīñ hai

credit-card ke bakre kī qurbānī se bachnā

tumheñ lahore ke fōtpath kā permit milā hai

lihāzā rā.e-vinD ke qasr-e-sultānī se bachnā

tumheñ ai 'ḳhālid'-e-irfān merā mashvara hai

ġhazal kahnā magar har jā ġhazal-ḳhvānī se bachnā

sehat achchhi na ho to zulf-e-niswani se bachna

fishaar-e-KHun ke hamle mein namak-dani se bachna

na ho income to bachchon ki farawani se bachna

gharibi mein farogh-e-nasl-e-insani se bachna

bahut mushkil hai begam ki nigahbani se bachna

samundar mein bhi rahna aur tughyani se bachna

guzishta ahd mein dhoka bahut khaya hai tum ne

magar is bar 'zardari' o 'gilani' se bachna

KHuda tum ko wazir-e-bijli-o-pani bana de

to phir tum sarafin-e-bijli-o-pani se bachna

KHuda ke ghar mein wisa-card ka system nahin hai

credit-card ke bakre ki qurbani se bachna

tumhein lahore ke footpath ka permit mila hai

lihaza rae-winD ke qasr-e-sultani se bachna

tumhein ai 'KHalid'-e-irfan mera mashwara hai

ghazal kahna magar har ja ghazal-KHwani se bachna