sehn-e-gulshan mein chali phir ke hawa bismillah

sehn-e-gulshan meñ chalī phir ke havā bismillāh

chashm-e-bad-dūr bahār aa.ī hai kyā bismillāh

mus.haf-e-ruḳh pe tire abrū-e-paivasta nahīñ

mū-qalam se yad-e-qudrat ne likhā bismillāh

is qadar thā vo nasha maiñ ki yakā-yak jo girā

maiñ na bolā pa mire dil ne kahā bismillāh

zulf us āriz-e-rañgīñ pe bikharne jo lagī

bol uThī muñh se vahīñ bād-e-sabā bismillāh

aaj gulshan meñ zarā paañv jo phislā us kā

gul hañsā ġhunche ne jaldī se kahā bismillāh

yaar qātil mire jo jo ki lagātā thā vaar

lab pe har zaḳhm ke nikle thī sadā bismillāh

shīsha o saaqī o sāġhar bhī hāzir haiñ 'nazīr'

mai-kashī kījiye ab der hai kyā bismillāh

sehn-e-gulshan mein chali phir ke hawa bismillah

chashm-e-bad-dur bahaar aai hai kya bismillah

mushaf-e-ruKH pe tere abru-e-paiwasta nahin

mu-qalam se yad-e-qudrat ne likha bismillah

is qadar tha wo nasha main ki yaka-yak jo gira

main na bola pa mere dil ne kaha bismillah

zulf us aariz-e-rangin pe bikharne jo lagi

bol uThi munh se wahin baad-e-saba bismillah

aaj gulshan mein zara panw jo phisla us ka

gul hansa ghunche ne jaldi se kaha bismillah

yar qatil mere jo jo ki lagata tha war

lab pe har zaKHm ke nikle thi sada bismillah

shisha o saqi o saghar bhi hazir hain 'nazir'

mai-kashi kijiye ab der hai kya bismillah