shadi o alam sab se hasil hai subukdoshi

shādī o alam sab se hāsil hai subukdoshī

sau hosh mire sadqe tujh par mirī be-hoshī

gum hone ko pā jaanā kahte haiñ mohabbat meñ

aur yaad kā rakkhā hai yaañ naam farāmoshī

kal ġhair ke dhoke meñ vo iid mile ham se

kholī bhī to dushman ne taqdīr-e-ham-āġhoshī

vo qulqul-e-mīnā meñ charche mirī tauba ke

aur shīsha-o-sāġhar kī mai-ḳhāne meñ sargoshī

ham rañj bhī paane par mamnūn hī hote haiñ

ham se to nahīñ mumkin ehsān-farāmoshī

hosh aatā hai phir mujh ko phir hosh mujhe aayā

denā nigah-e-sāqī ik sāġhar-e-be-hoshī

kal arsa-e-mahshar meñ jab aib khuleñ mere

rahmat tirī phailā de dāmān-e-ḳhatā-poshī

milte hī nazar tujh se mastāna huā 'bedam'

saaqī tirī āñkheñ haiñ yā sāġhar-e-be-hoshī

shadi o alam sab se hasil hai subukdoshi

sau hosh mere sadqe tujh par meri be-hoshi

gum hone ko pa jaana kahte hain mohabbat mein

aur yaad ka rakkha hai yan nam faramoshi

kal ghair ke dhoke mein wo id mile hum se

kholi bhi to dushman ne taqdir-e-ham-aghoshi

wo qulqul-e-mina mein charche meri tauba ke

aur shisha-o-saghar ki mai-KHane mein sargoshi

hum ranj bhi pane par mamnun hi hote hain

hum se to nahin mumkin ehsan-faramoshi

hosh aata hai phir mujh ko phir hosh mujhe aaya

dena nigah-e-saqi ek saghar-e-be-hoshi

kal arsa-e-mahshar mein jab aib khulen mere

rahmat teri phaila de daman-e-KHata-poshi

milte hi nazar tujh se mastana hua 'bedam'

saqi teri aankhen hain ya saghar-e-be-hoshi