shaKH-e-be-numu par bhi aks-e-gul jawan rakhna

shāḳh-e-be-numū par bhī aks-e-gul javāñ rakhnā

aa gayā hameñ aalī dil ko shādmāñ rakhnā

be-falak zamīnoñ par raushnī ko tarsoge

soch ke darīchoñ meñ koī kahkashāñ rakhnā

rah-rav-e-tamannā kī dāstāñ hai bas itnī

sub.h o shaam ik dhun meñ ḳhud ko nīm-jāñ rakhnā

kār-o-bār-e-duniyā meñ ahl-e-dard kī daulat

suud sab luTā denā paas har ziyāñ rakhnā

us kī yaad meñ ham ko rabt o zabt girya se

shab lahū lahū rakhnī din dhuāñ dhuāñ rakhnā

ishq ḳhud sikhātā hai saarī hikmateñ 'ālī'

naqd-e-dil kise denā bār-e-sar kahāñ rakhnā

shaKH-e-be-numu par bhi aks-e-gul jawan rakhna

aa gaya hamein aali dil ko shadman rakhna

be-falak zaminon par raushni ko tarsoge

soch ke darichon mein koi kahkashan rakhna

rah-raw-e-tamanna ki dastan hai bas itni

subh o sham ek dhun mein KHud ko nim-jaan rakhna

kar-o-bar-e-duniya mein ahl-e-dard ki daulat

sud sab luTa dena pas har ziyan rakhna

us ki yaad mein hum ko rabt o zabt girya se

shab lahu lahu rakhni din dhuan dhuan rakhna

ishq KHud sikhata hai sari hikmaten 'ali'

naqd-e-dil kise dena bar-e-sar kahan rakhna