shaKH-e-gul hai ki ye talwar khinchi hai yaro

shāḳh-e-gul hai ki ye talvār khiñchī hai yaaro

baaġh meñ kaisī havā aaj chalī hai yaaro

kaun hai ḳhauf-zada jashn-e-sahar se pūchho

raat kī nabz to ab chhūT chalī hai yaaro

taak ke dil se dil-e-shīsha-o-paimāna tak

ek ik buuñd meñ sau sham.a jalī hai yaaro

chuum lenā lab-e-lālīñ kā hai rindoñ ko ravā

rasm ye bāda-e-gul-gūñ se chalī hai yaaro

sirf ik ġhuncha se sharminda hai aalam kī bahār

dil-e-ḳhūñ-gashta ke hoñToñ pe hañsī hai yaaro

vo jo añgūr ke ḳhoshoñ meñ thī mānind-e-nu.jūm

Dhal ke ab jaam meñ ḳhurshīd banī hai yaaro

bū-e-ḳhūñ aatī hai miltā hai bahāroñ kā surāġh

jaane kis shoḳh sitamgar kī galī hai yaaro

ye zamīñ jis se hai ham ḳhāk-nashīnoñ kā uruuj

ye zamīñ chāñd sitāroñ meñ ghirī hai yaaro

jur.a-e-talḳh bhī hai jām-gavārā bhī hai

zindagī jashn-gah-e-bāda-kashī hai yaaro

shaKH-e-gul hai ki ye talwar khinchi hai yaro

bagh mein kaisi hawa aaj chali hai yaro

kaun hai KHauf-zada jashn-e-sahar se puchho

raat ki nabz to ab chhuT chali hai yaro

tak ke dil se dil-e-shisha-o-paimana tak

ek ek bund mein sau shama jali hai yaro

chum lena lab-e-lalin ka hai rindon ko rawa

rasm ye baada-e-gul-gun se chali hai yaro

sirf ek ghuncha se sharminda hai aalam ki bahaar

dil-e-KHun-gashta ke honTon pe hansi hai yaro

wo jo angur ke KHoshon mein thi manind-e-nujum

Dhal ke ab jam mein KHurshid bani hai yaro

bu-e-KHun aati hai milta hai bahaaron ka suragh

jaane kis shoKH sitamgar ki gali hai yaro

ye zamin jis se hai hum KHak-nashinon ka uruj

ye zamin chand sitaron mein ghiri hai yaro

jura-e-talKH bhi hai jam-gawara bhi hai

zindagi jashn-gah-e-baada-kashi hai yaro