shaKH-e-ummid jal gai hogi

shāḳh-e-ummīd jal ga.ī hogī

dil kī hālat sambhal ga.ī hogī

'jaun' us aan tak ba-ḳhair huuñ maiñ

zindagī daav chal ga.ī hogī

ik jahannum hai merā siina bhī

aarzū kab kī gal ga.ī hogī

sozish-e-partav-e-nigāh na pūchh

mardumak to pighal ga.ī hogī

ham ne dekhe the ḳhvāb sho.aloñ ke

niiñd āñkhoñ meñ jal ga.ī hogī

us ne māyūs kar diyā hogā

phāñs dil se nikal ga.ī hogī

ab to dil hī badal gayā ab to

saarī duniyā badal ga.ī hogī

dil galī meñ raqīb dil kā julūs

vaañ to talvār chal ga.ī hogī

ghar se jis roz maiñ chalā hūñgā

dil kī dillī machal ga.ī hogī

dhuup ya.anī ki zard zard ik dhuup

laal qil.e se Dhal ga.ī hogī

hijr-e-hiddat meñ yaad kī ḳhushbū

ek pañkhā sā jhal ga.ī hogī

aa.ī thī mauj-e-sabz-e-bād-e-shimāl

yaad kī shāḳh phal ga.ī hogī

vo dam-e-sub.h ġhusl-ḳhāne meñ

mere pahlū se shal ga.ī hogī

shām-e-sub.h-e-firāq daa.im hai

ab tabī.at bahal ga.ī hogī

shaKH-e-ummid jal gai hogi

dil ki haalat sambhal gai hogi

'jaun' us aan tak ba-KHair hun main

zindagi daw chal gai hogi

ek jahannum hai mera sina bhi

aarzu kab ki gal gai hogi

sozish-e-partaw-e-nigah na puchh

mardumak to pighal gai hogi

hum ne dekhe the KHwab shoalon ke

nind aankhon mein jal gai hogi

us ne mayus kar diya hoga

phans dil se nikal gai hogi

ab to dil hi badal gaya ab to

sari duniya badal gai hogi

dil gali mein raqib dil ka julus

wan to talwar chal gai hogi

ghar se jis roz main chala hunga

dil ki dilli machal gai hogi

dhup yani ki zard zard ek dhup

lal qile se Dhal gai hogi

hijr-e-hiddat mein yaad ki KHushbu

ek pankha sa jhal gai hogi

aai thi mauj-e-sabz-e-baad-e-shimal

yaad ki shaKH phal gai hogi

wo dam-e-subh ghusl-KHane mein

mere pahlu se shal gai hogi

sham-e-subh-e-firaq daim hai

ab tabiat bahal gai hogi