shaKH meri na ab shajar mera

shāḳh merī na ab shajar merā

iḳhtiyār ab hai āñkh-bhar merā

aa.ine meñ to aks hai lekin

maar Dālegā mujh ko Dar merā

kaun jaane kahāñ kahāñ jā.ūñ

ham-safar ab ke hai safar merā

āsmānoñ pe tū rahā ḳhāmosh

ghar gayā tere naam par merā

maiñ ne sajde meñ sar jhukāyā thā

le ga.e sar utaar kar merā

tujh ko sab se judā banā dūñgā

chhīn mat harf kā hunar merā

dasht-o-sahrā ujaaḌ aayā huuñ

DhūñDhtā huuñ kahāñ hai ghar merā

dast-o-bāzū liye zabāñ mat le

āḳhirī par tū mat katar merā

mū-ba-mū kuchh simaT rahā hai 'nizām'

aur charchā hai dar-ba-dar merā

shaKH meri na ab shajar mera

iKHtiyar ab hai aankh-bhar mera

aaine mein to aks hai lekin

mar Dalega mujh ko Dar mera

kaun jaane kahan kahan jaun

ham-safar ab ke hai safar mera

aasmanon pe tu raha KHamosh

ghar gaya tere nam par mera

main ne sajde mein sar jhukaya tha

le gae sar utar kar mera

tujh ko sab se juda bana dunga

chhin mat harf ka hunar mera

dasht-o-sahra ujaD aaya hun

DhunDhta hun kahan hai ghar mera

dast-o-bazu liye zaban mat le

aaKHiri par tu mat katar mera

mu-ba-mu kuchh simaT raha hai 'nizam'

aur charcha hai dar-ba-dar mera