shaKH shaKH par mausam-e-gul ne gajre se laTkae the

shāḳh shāḳh par mausam-e-gul ne gajre se laTkā.e the

maiñ ne jis-dam haath baḌhāyā saare phuul parā.e the

kitne dard chamak uThte haiñ furqat ke sannāTe meñ

raat rāt-bhar jaag ke ham ne ḳhud pe zaḳhm lagā.e the

tere ġhamoñ kā zikr hī kyā ab jaane de ye baat na chheḌ

ham dīvāne mulk-e-junūñ meñ baḳht-e-sikandar laa.e the

dil kī vīrāñ bastī mujh se aksar pūchhā kartī hai

baste haiñ kis des meñ ab vo log yahāñ jo aa.e the

pichhlī raat ko taare ab bhī jhilmil karte haiñ

kis ko ḳhabar hai ik shab ham ne kitne ashk bahā.e the

aaj jahāñ kī tārīkī se duniyā bach kar chaltī hai

ham ne us vīrān mahal meñ lākhoñ diip jalā.e the

mujh ko un se pyaar nahīñ hai mujh ko un ke naam se kyā

āñkheñ yuuñ hī bhar aa.ī thiiñ hoñT yūñhī tharrā.e the

shaKH shaKH par mausam-e-gul ne gajre se laTkae the

main ne jis-dam hath baDhaya sare phul parae the

kitne dard chamak uThte hain furqat ke sannaTe mein

raat raat-bhar jag ke hum ne KHud pe zaKHm lagae the

tere ghamon ka zikr hi kya ab jaane de ye baat na chheD

hum diwane mulk-e-junun mein baKHt-e-sikandar lae the

dil ki viran basti mujh se aksar puchha karti hai

baste hain kis des mein ab wo log yahan jo aae the

pichhli raat ko tare ab bhi jhilmil karte hain

kis ko KHabar hai ek shab hum ne kitne ashk bahae the

aaj jahan ki tariki se duniya bach kar chalti hai

hum ne us viran mahal mein lakhon dip jalae the

mujh ko un se pyar nahin hai mujh ko un ke nam se kya

aankhen yun hi bhar aai thin honT yunhi tharrae the