sham aai hai liye hath mein yaadon ke charagh

shaam aa.ī hai liye haath meñ yādoñ ke charāġh

vo tire saath guzāre hue lamhoñ ke charāġh

mere is ghar meñ añdherā kabhī hotā hī nahīñ

haiñ mire siine meñ jalte hue zaḳhmoñ ke charāġh

laakh tūfān hoñ kuTiyā mirī raushan hī rahī

ek barsāt se bujhne lage mahloñ ke charāġh

zindagī talḳh haqīqat kī hai andhī sī galī

apnī āñkhoñ meñ jalāte raho sapnoñ ke charāġh

ek muddat se dhadhaktā rahā merā ye zehn

tab kahīñ jā ke farozāñ hue lafzoñ ke charāġh

ḳhud kā hī nuur kiyā kartā hai raushan dil ko

raushnī tujh ko bhalā kaise deñ ġhairoñ ke charāġh

saarī duniyā ko ḳhudā ek hī sūraj de de

kaash bujh jaa.eñ zamāne se ye firqoñ ke charāġh

ab to jamhūr kī tāqat kā hī sūraj hai 'sahāb'

ab zamāne meñ kahāñ jalte haiñ shāhoñ ke charāġh

sham aai hai liye hath mein yaadon ke charagh

wo tere sath guzare hue lamhon ke charagh

mere is ghar mein andhera kabhi hota hi nahin

hain mere sine mein jalte hue zaKHmon ke charagh

lakh tufan hon kuTiya meri raushan hi rahi

ek barsat se bujhne lage mahlon ke charagh

zindagi talKH haqiqat ki hai andhi si gali

apni aankhon mein jalate raho sapnon ke charagh

ek muddat se dhadhakta raha mera ye zehn

tab kahin ja ke farozan hue lafzon ke charagh

KHud ka hi nur kiya karta hai raushan dil ko

raushni tujh ko bhala kaise den ghairon ke charagh

sari duniya ko KHuda ek hi suraj de de

kash bujh jaen zamane se ye firqon ke charagh

ab to jamhur ki taqat ka hi suraj hai 'sahab'

ab zamane mein kahan jalte hain shahon ke charagh