sham-e-gham aaj zara aise mana li jae

shām-e-ġham aaj zarā aise manā lī jaa.e

be-sabab ek ġhazal aur sunā lī jaa.e

hākim-e-vaqt ko dekhūñ to duā kartā huuñ

itnī izzat de ḳhudā jitnī sañbhālī jaa.e

mere maulā vo ḳhasāre ke sivā kuchh bhī nahīñ

har vo lamha jo tirī yaad se ḳhālī jaa.e

gar mire haath meñ aa jaa.e alādīñ kā charāġh

ghar kā mazdūr koī haath na ḳhālī jaa.e

had se bhī baḌh ke zarūrī hai duā.eñ karnā

aur is se bhī zarūrī hai duā lī jaa.e

pūchhtā kyā hai kamā.ī kā tire shahr meñ dost

ye bhī daulat hai ki izzat hī bachā lī jaa.e

aao sajde meñ kareñ baat 'mubārak' us se

jis ke dar se na koī ḳhālī savālī jaa.e

sham-e-gham aaj zara aise mana li jae

be-sabab ek ghazal aur suna li jae

hakim-e-waqt ko dekhun to dua karta hun

itni izzat de KHuda jitni sanbhaali jae

mere maula wo KHasare ke siwa kuchh bhi nahin

har wo lamha jo teri yaad se KHali jae

gar mere hath mein aa jae aladin ka charagh

ghar ka mazdur koi hath na KHali jae

had se bhi baDh ke zaruri hai duaen karna

aur is se bhi zaruri hai dua li jae

puchhta kya hai kamai ka tere shahr mein dost

ye bhi daulat hai ki izzat hi bacha li jae

aao sajde mein karen baat 'mubarak' us se

jis ke dar se na koi KHali sawali jae