sham-e-gham kuchh us nigah-e-naz ki baaten karo

shām-e-ġham kuchh us nigāh-e-nāz kī bāteñ karo

be-ḳhudī baḌhtī chalī hai raaz kī bāteñ karo

ye sukūt-e-nāz ye dil kī ragoñ kā TūTnā

ḳhāmushī meñ kuchh shikast-e-sāz kī bāteñ karo

nik.hat-e-zulf-e-pareshāñ dāstān-e-shām-e-ġham

sub.h hone tak isī andāz kī bāteñ karo

har rag-e-dil vajd meñ aatī rahe dukhtī rahe

yūñhī us ke jā-o-bejā naaz kī bāteñ karo

jau adam kī jaan hai jo hai payām-e-zindagī

us sukūt-e-rāz us āvāz kī bāteñ karo

ishq rusvā ho chalā be-kaif sā bezār sā

aaj us kī nargas-e-ġhammaz kī bāteñ karo

naam bhī lenā hai jis kā ik jahān-e-rañg-o-bū

dosto us nau-bahār-e-nāz kī bāteñ karo

kis liye uzr-e-taġhāful kis liye ilzām-e-ishq

aaj charḳh-e-tafraqa-parvāz kī bāteñ karo

kuchh qafas kī tīliyoñ se chhan rahā hai nuur sā

kuchh fazā kuchh hasrat-e-parvāz kī bāteñ karo

jo hayāt-e-jāvidāñ hai jo hai marg-e-nā-gahāñ

aaj kuchh us naaz us andāz kī bāteñ karo

ishq-e-be-parvā bhī ab kuchh nā-shakebā ho chalā

shoḳhī-e-husn-e-karishma-sāz kī bāteñ karo

jis kī furqat ne palaT dī ishq kī kaayā 'firāq'

aaj us īsā-nafas dam-sāz kī bāteñ karo

sham-e-gham kuchh us nigah-e-naz ki baaten karo

be-KHudi baDhti chali hai raaz ki baaten karo

ye sukut-e-naz ye dil ki ragon ka TuTna

KHamushi mein kuchh shikast-e-saz ki baaten karo

nikhat-e-zulf-e-pareshan dastan-e-sham-e-gham

subh hone tak isi andaz ki baaten karo

har rag-e-dil wajd mein aati rahe dukhti rahe

yunhi us ke ja-o-beja naz ki baaten karo

jau adam ki jaan hai jo hai payam-e-zindagi

us sukut-e-raaz us aawaz ki baaten karo

ishq ruswa ho chala be-kaif sa bezar sa

aaj us ki nargas-e-ghammaz ki baaten karo

nam bhi lena hai jis ka ek jahan-e-rang-o-bu

dosto us nau-bahaar-e-naz ki baaten karo

kis liye uzr-e-taghaful kis liye ilzam-e-ishq

aaj charKH-e-tafraqa-parwaz ki baaten karo

kuchh qafas ki tiliyon se chhan raha hai nur sa

kuchh faza kuchh hasrat-e-parwaz ki baaten karo

jo hayat-e-jawidan hai jo hai marg-e-na-gahan

aaj kuchh us naz us andaz ki baaten karo

ishq-e-be-parwa bhi ab kuchh na-shakeba ho chala

shoKHi-e-husn-e-karishma-saz ki baaten karo

jis ki furqat ne palaT di ishq ki kaya 'firaq'

aaj us isa-nafas dam-saz ki baaten karo